މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް) އިން ކުރިއަށް އޮތް ތިން ދުވަހު ރާއްޖޭގެ 13 ސަރަޙައްދެއްގައި ހަތިޔާރާއެކު ޚާއްޞަ އަސްކަރީ ތަމްރީނުތަކެއް ކުރިއަށް ގެންދިއުމަށް ނިންމައިފިއެވެ.
އެމްއެންޑީއެފްއިން ހާމަކޮށްފައިވާ ގޮތުގައި، މި ތަމްރީނުތައް ކުރިއަށް އޮތް ތިން ދުވަހުގެ މުއްދަތަށް ކުރިއަށް ދާނެއެވެ. މި ހަރަކާތްތަކުގައި ސިފައިން ހަރަކާތްތެރިވާނީ ހަތިޔާރާއެކުގައެވެ. ނަމަވެސް، އާންމު ރައްޔިތަކަށް ނުވަތަ މުދަލަކަށް އެއްވެސް ގެއްލުމެއް ނުލިބޭނެ ގޮތަށް ސަލާމަތީ ފިޔަވަޅުތައް އަޅާފައިވާނެކަމަށާއި، މިކަމަށްޓަކައި ބޭނުންކުރާނީ ބްލޭންކްސް އަދި ޕައިރޯޓެކްނިކްސް ކަމަށް އެ އިދާރާއިން ބުނެފައިވެއެވެ.
މި ފަހަރުގެ އަސްކަރީ ތަމްރީނުތައް މައިގަނޑު ގޮތެއްގައި ކުރިއަށް ގެންދިއުމަށް ހަމަޖެހިފައިވަނީ ހައްދުންމަތީގެ ރަށްތަކުގައެވެ. އޭގެ ތެރޭގައި ހިމެނެނީ ބަރެސްދޫ، ފޮނަދޫ، ކައްދޫ، މާންދޫ، ގަން (މުކުރިމަގު، މަތިމަރަދޫ އަދި ތުނޑި)، މުންޑޫ، މާބައިދޫ، ބޮކެފުށި، ކަޅައިދޫ، އުވަދެވިފުށި، މަހާކަންފުށި، ގަސްފިނޮޅު އަދި ބޮޑުފިނޮޅެވެ. މިއީ ސިފައިންގެ ތަމްރީނުތަކަށް އާންމުކޮށް ބޭނުންކުރާ، އަދި އަސްކަރީ މަރުކަޒުތައް ގާއިމުވެފައިވާ ސަރަޙައްދުތަކެކެވެ.
ދިވެހި ސިފައިންގެ ލަޝްކަރުގެ ޤާބިލުކަމާއި ތައްޔާރީ ހާލަތު ވަރުގަދަކުރުމުގެ ގޮތުން، އަހަރުގެ އެކި ދުވަސްވަރު މާލެއާއި އަތޮޅުތަކުގެ އެކި ސަރަޙައްދުތަކުގައި އެމްއެންޑީއެފްއިން އަންނަނީ މިފަދަ އެއްގަމާއި ކަނޑުގެ ތަމްރީނުތައް ކުރިއަށް ގެންދަމުންނެވެ. މީގެ އިތުރުން، ލަޝްކަރުގެ ހުނަރުވެރިކަން އިތުރުކުރުމަށްޓަކައި ރާއްޖެއިން ބޭރަށް ސިފައިން ފޮނުވައިގެންވެސް ތަފާތު އެކި ތަމްރީނު ޕްރޮގްރާމްތައް ފުރިހަމަކުރަމުންދާކަން ފާހަގަކުރެވެއެވެ.
ކިޔުންތެރިންގެ ހިޔާލު