ޖަރުމަނުވިލާތުގެ ބާލިންގައި ބޭއްވުމަށް ހަމަޖެހިފައިވާ “ބާލިން ކްލައިމެޓް މޮބިލިޓީ ފޯރަމް 2026” ގައި ބައިވެރިވެވަޑައިގަތުމަށްޓަކައި، ރާއްޖޭގެ ނައިބު ރައީސް ހުސައިން މުހައްމަދު ލަތީފް ރޭ ޖަރުމަނަށް ފުރާވަޑައިގެންފިއެވެ.
މި މަހުގެ 18 އިން 19 އަށް ކުރިއަށްދާ މި ފޯރަމަކީ މޫސުމަށް އަންނަ ބަދަލުތަކުގެ ސަބަބުން މީހުން އެއްތަނުން އަނެއްތަނަށް ހިޖުރަކުރަންޖެހުމާއި، އޭގެ ސަބަބުން ކުރިމަތިވާ ގޮންޖެހުންތަކާ ގުޅޭގޮތުން މަޝްވަރާކުރުމަށް ބާއްވާ މަތީ ފަންތީގެ ބައްދަލުވުމެކެވެ. މި އަހަރުގެ ފޯރަމްގައި ދުނިޔޭގެ އެކި ގައުމުތަކުގެ އިސްވެރިންނާއި، ސަރުކާރުތަކުގެ މަތީ ފަންތީގެ މަންދޫބުންނާއި، މޫސުމީ ބަދަލުތަކުގެ އަސަރު އެންމެ ބޮޑަށް ކުރާ މުޖުތަމައުތަކުގެ މަންދޫބުންގެ އިތުރުން ޒުވާން އުފެއްދުންތެރިނަ ބައިވެރިވާނެއެވެ.
މި ދަތުރުފުޅުގެ ތެރެއިން ނައިބު ރައީސް “ގްލޯބަލް ކްލައިމެޓް މޮބިލިޓީ ޕްރިންސިޕަލްސް” އާ ގުޅޭ މަތީ ފަންތީގެ ސެގްމަންޓް ހުޅުވުމުގެ ރަސްމިއްޔާތުގައި ބަޔާނެއް އިއްވެވުމަށް ވަނީ ހަމަޖެހިފައެވެ. މީގެ އިތުރުން، ކަނޑުގެ ލޮނުގަނޑު އުފުލުމުގެ ސަބަބުން ކުރިމަތިވާ ނުރައްކާތަކުގައި އިންސާނީ ހައްގުތައް ހިމާޔަތްކުރުމާ ގުޅޭގޮތުން ބާއްވާ މަތީ ފަންތީގެ ޕެނަލް ޑިސްކަޝަނެއްގައިވެސް އެމަނިކުފާނު ބައިވެރިވެވަޑައިގަންނަވާނެއެވެ.
ރައީސް އޮފީހުން ވިދާޅުވި ގޮތުގައި މި ފޯރަމްގެ އެންމެ މުހިންމު އެއް މަގްސަދަކީ “ގްލޯބަލް ކްލައިމެޓް މޮބިލިޓީ ޕްރިންސިޕަލްސް” ރަސްމީކޮށް ބަލައިގަތުމެވެ. މިއީ މޫސުމީ ބަދަލުތަކުގެ ސަބަބުން އަމިއްލަ ވަޒަން ދޫކޮށް ދާންޖެހޭ ހާލަތްތަކުގައި، އިންސާނީ ކަރާމާތް ހިފެހެއްޓުމަށާއި، އަމިއްލަ މުޖުތަމައުގައި ދެމިތިބުމުގެ ހައްގު (ރައިޓް ޓު ސްޓޭ) ކަށަވަރުކުރުމަށް ބާރުއަޅާ މުހިންމު އެއްބަސްވުމެކެވެ. އަދި މި އުސޫލުތައް އަމަލީ ގޮތުން ތަންފީޒުކުރުމަށް ބޭނުންވާ މަގުޗާޓެއް އެކުލަވާލުމަށްވެސް މި ފޯރަމްގައި މަޝްވަރާ ކުރެވޭނެއެވެ.
ނައިބު ރައީސްގެ މި ދަތުރުފުޅަކީ މޫސުމަށް އަންނަ ބަދަލުތަކުން ރާއްޖެ ފަދަ ނާޒުކު ގައުމުތަކަށް ކުރާ ނޭދެވޭ އަސަރުތަކާއި، އެކަމުން ރައްކާތެރިވުމަށް ބައިނަލްއަގުވާމީ ފެންވަރުގައި ކުރެވޭ މަސައްކަތްތަކުގައި ރާއްޖޭގެ ދައުރު ފުޅާކުރުމަށް ލިބޭ މުހިންމު ފުރުސަތެކެވެ.
ކިޔުންތެރިންގެ ހިޔާލު