ޓިކްޓޮކްގައި “އިނާ” ގެ ނަމުގައި ހިންގާ ފޭކު އެކައުންޓަކުން އޮޅުވާލައިގެން މަކަރާއި ހީލަތުން ގިނަ ބައެއްގެ އަތުން ފައިސާ ހޯދަމުންދާތީ، އެކަމަށް އާންމުން ސަމާލުވުމަށް ދިވެހި ފުލުހުންގެ ޚިދުމަތުން މިއަދު އިލްތިމާސްކޮށްފިއެވެ. ފުލުހުންގެ އެންޓި ސްކޭމް ސެންޓަރުން ބުނީ މި އެކައުންޓް ހިންގާ ފަރާތް ހޯދުމުގެ މަސައްކަތް މިހާރު ކުރަމުންދާ ކަމަށެވެ.
މި މައްސަލައާ ގުޅިގެން ފުލުހުން އާންމުކޮށްފައިވާ މައުލޫމާތުގައިވާ ގޮތުން، މި އެކައުންޓް މެދުވެރިކޮށް ތަފާތު އެކި ބާވަތްތަކުގެ ތަކެތި ވިއްކުމަށް ދަނީ އިޝްތިހާރު ކުރަމުންނެވެ. އޭގެ ތެރޭގައި ތެލުލި ބަނބުކެޔޮ ފަދަ ކާބޯތަކެތި ވިއްކުމަށާއި، ދުވަހު ކުއްޔަށް ކޮޓަރި ދޫކުރާ ކަމަށް ބުނެ ގިނަ އަދަދެއްގެ ޕޯސްޓުތައް މި އެކައުންޓުގައި ވަނީ ކޮށްފައެވެ. ނަމަވެސް މިއީ ރައްޔިތުންނަށް އޮޅުވާލައިގެން ފައިސާ ހޯދުމަށް ހިންގާ ސްކޭމެއްކަން ފާހަގަކުރެވިފައިވާތީ، އެއްވެސް ފަރާތަކުން މި އެކައުންޓާ މުއާމަލާތް ނުކުރުމަށް ފުލުހުން ވަނީ އެދިފައެވެ.
ސޯޝަލް މީޑިއާގެ އެކި ޕްލެޓްފޯމްތަކުގައި މިފަދަ ފޭކު އެކައުންޓްތައް ހަދައިގެން ޖިނާއީ ކުށްތަކަށް އަރައިގަންނަމުންދާ ފަރާތްތައް ހޯދައި، އެފަރާތްތަކާމެދު ގާނޫނީ ގޮތުން އަޅަންޖެހޭ އެންމެހާ ފިޔަވަޅުތައް އަޅަމުންދާނެ ކަމުގެ ޔަގީންކަން ފުލުހުން ވަނީ ދީފައެވެ. މީގެ އިތުރުން މާލީ ސްކޭމްތަކާއި އިންޓަނެޓް މެދުވެރިކޮށް ހިންގާ މިފަދަ ކުށްތައް ހުއްޓުވުމަށް މޯލްޑިވްސް މަނިޓަރީ އޮތޯރިޓީއާއި ފުލުހުން ގުޅިގެން ދަނީ ގިނަ މަސައްކަތްތަކެއް ކުރަމުންނެވެ.
މިގޮތުން، ސްކޭމްތަކާ ދެކޮޅަށް ރާއްޖޭގައި ކުރާ މަސައްކަތްތައް އިތުރަށް ހަރުދަނާކުރުމަށް ދިވެހި ފުލުހުންނާއި މޯލްޑިވްސް މަނިޓަރީ އޮތޯރިޓީ ގުޅިގެން ސިންގަޕޫރު ފުލުހުންނާއެކު ދާދި ފަހުން ވަނީ މުހިންމު ބައްދަލުވުމެއް ބާއްވާފައެވެ. މިއީ ސްކޭމްތައް ހުއްޓުވުމަށާއި، އޭގެ ސަބަބުން ލިބޭ ގެއްލުންތައް ކުޑަކޮށް، ގެއްލޭ ފައިސާ އަނބުރާ ހޯދުމަށް ރާއްޖޭގެ މުއައްސަސާތައް ގުޅިގެން ހިންގި ފުރަތަމަ ބޮޑު ހަރަކާތް ކަމަށް ފުލުހުން ވަނީ މައުލޫމާތު ދީފައެވެ.
ކިޔުންތެރިންގެ ހިޔާލު