ފީފާ ވޯލްޑް ކަޕް 2026 ފެށުމުގެ ރަސްމިއްޔާތު އެސްޓޭޑިއޯ އެޒްޓޭކާގައި ވަރަށް ކުލަގަދަކޮށް ބާއްވައިފިއެވެ. މެކްސިކޯއާއި ދެކުނު އެފްރިކާ ބައްދަލުކުރި ފުރަތަމަ މެޗުގެ ކުރިން ބޭއްވި މި ރަސްމިއްޔާތުގައި މަޝްހޫރު ތަރިންގެ ހުށަހެޅުންތައް ފެނިގެން ދިޔައެވެ. މި މުބާރާތަކީ މެކްސިކޯގެ އިތުރުން އެމެރިކާއާއި ކެނެޑާ ގުޅިގެން ބާއްވާ މުބާރާތެކެވެ. މުޅި މުބާރާތުގައި 104 މެޗު ކުޅެން ހަމަޖެހިފައިވާއިރު، ފައިނަލް މެޗު އޮންނާނީ ޖުލައި 19 ގައި ނިއު ޖާޒީގައެވެ.
ރަސްމިއްޔާތުގެ އެންމެ ހާއްސަ ހުށަހެޅުމަކަށްވީ، ކޮލަމްބިއާގެ ތަރި ޝަކީރާއާއި ނައިޖީރިއާގެ ލަވަކިޔުންތެރިޔާ ބާނާ ބޯއީ ގުޅިގެން މުބާރާތުގެ ރަސްމީ ލަވަ “ޑައި ޑައި” ހުށަހަޅައިދިނުމެވެ. މީގެ އިތުރުން ޖޭ ބަލްވިންއާއި އިޓަލީގެ އެންޑްރިއާ ބޮޗެލީ ވެސް ހުށަހެޅުންތައް ހުށަހަޅައިދިނެވެ. 80،000 މީހުންގެ ޖާގައިގެ މި ދަނޑަކީ 1970 އަދި 1986 ވަނަ އަހަރުގެ ވޯލްޑް ކަޕް ފައިނަލް މެޗުތައް ބޭއްވި ދަނޑެވެ. މި މުބާރާތަށްޓަކައި މި ދަނޑު ވަނީ މަރާމާތުކޮށް ރީތިކޮށްފައެވެ. ދަނޑުތެރޭގައި ހަރަކާތްތެރިވި ނެށުންތެރިންނާއި، ވައިގެ ތެރެއަށް ދޫކޮށްލި ހަވާން މުޅި ދަނޑު ވަނީ ގުގުމާލާފައެވެ.
ދަނޑުތެރޭގައި ފޯރިގަދަވި ނަމަވެސް، މެކްސިކޯ ސިޓީގެ މަރުކަޒީ ސަރަހައްދުގައި ހުންނަ ފޭން ޒޯނަށް ވަންނަން އުޅުނު ސަޕޯޓަރުންގެ މެދުގައި ވަނީ ހަމަނުޖެހުންތަކެއް ހިނގާފައެވެ.
ފޭން ޒޯނަށް ވަންނަން އެތައް ހާސް ސަޕޯޓަރުންނެއް ތޮއްޖެހުމުގެ ސަބަބުން އެތަން ކޮންޓްރޯލް ކުރަން އޮފިޝަލުންނަށް އުނދަގޫވިއެވެ. އެ ސަރަހައްދުގައި ދެކޮޅަށް މުޒާހަރާކުރަމުން ދިޔަ މުދައްރިސުން ހުއްޓުވުމަށް ޖަހާފައި ހުރި ދަގަނޑު ހުރަސްތަކުގެ ސަބަބުން ވަދެ ނުކުތުމަށް ވަނީ ދަތިތަކެއް ކުރިމަތިވެފައެވެ. ސަރަހައްދު ފުރިފައިވާ ކަމަށް އިއުލާނުކޮށް، އެހެން ސަރަހައްދުތަކަށް ދިޔުމަށް ސަރުކާރުން އިރުޝާދު ދިނެވެ.
ކިޔުންތެރިންގެ ހިޔާލު