ރާއްޖޭގައި ރަސްމީކޮށް ފުޓުބޯޅަ ކުޅެން ފެށިތާ 75 އަހަރު ފުރުމުގެ ގޮތުން ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން އިންތިޒާމުކުރި “ޑައިމަންޑް ޖުބިލީ އިންޓަނޭޝަނަލް ފުޓުބޯޅަ މުބާރާތް” ކުޅުނު އެއްވެސް މެޗަކުން ބަލިނުވެ ޕާކިސްތާނުން ކާމިޔާބުކޮށްފިއެވެ.
މުބާރާތުގައި ވާދަކުރި ހަތަރު ގައުމުގެ ތެރެއިން ފީފާ ރޭންކިންގައި އެންމެ ދަށުގައި އޮތް ޕާކިސްތާނުން ޗެމްޕިއަންކަން ހޯދީ، ފައިނަލުގައި އެންމެ މަތިން ރޭންކު ކުރެވިފައިވާ އަފްޣާނިސްޠާނުގެ މައްޗަށް 0-2 ގެ ނަތީޖާއަކުން ކުރިހޯދައިގެންނެވެ.
ދެ ޓީމުގެ ފަރާތުންވެސް ލަސް އަދި ހަމަހަމަ ކުޅުމެއް ފެނުނު މި މެޗުގެ ފުރަތަމަ ލަނޑު މެޗުގެ 24 ވަނަ މިނެޓުގައި ޕާކިސްތާނަށް ކާމިޔާބުކޮށްދިނީ ރީތި އޯވަހެޑް ކިކަކުން ޝާޔަކް ދޯސްތެވެ. ފުރަތަމަ ހާފުގެ އިތުރު ވަގުތުގައި އަފްޣާނިސްތާނުގެ އޮމަދު މުސާވީ ފޮނުވާލި ނުރައްކާތެރި ހަމަލާއެއް ގޯލުގެ ހުރަސްދަނޑިއަށް އަމާޒުވިއިރު، ޕާކިސްތާނުން މެޗުގެ މޮޅުކަން ކަށަވަރުކުރި ދެވަނަ ލަނޑު މެޗުގެ ފުރިހަމަވަގުތު ހަމަވެގެން ދެއްކި އިތުރުވަގުތުގެ ތެރޭގައި ޖަހައިދިނީ ހާރޫން އައް ރާޝިދެވެ.
ފައިނަލް މެޗުގެ މޮޅު ކުޅުންތެރިޔާގެ މަޤާމު ޝާޔަކް ދޯސްތު ހޯދިއިރު، މުބާރާތުގެ ޓޮޕް ސްކޯރަރަކަށް ހޮވުނީ ހާރޫންއެވެ. އަދި މުޅި މުބާރާތުގެ އެންމެ މޮޅު ކުޅުންތެރިޔާގެ މަޤާމު ޕާކިސްތާނުގެ އޯޓިސް ޖާން މުޙައްމަދު ހޯދާފައިވާއިރު، ވަނަވަނައަށް ހޮވުނު ފަރާތްތަކަށް ޓްރޮފީ ހަވާލުކޮށްދެއްވީ ޒުވާނުން ބާރުވެރިކުރުވުމާއި ކުޅިވަރާއި ހަށިހެޔޮކަމާ ބެހޭ ވަޒީރު އަބްދުﷲ ރާފިއު އެވެ.
މި މުބާރާތުގެ ތިންވަނަ ބަންގްލަދޭޝްއަށް ލިބުނުއިރު، މުބާރާތް ބޭއްވި ދިވެހިރާއްޖެ ނިންމާލަން ޖެހުނީ އެއްވެސް މެޗަކުން މޮޅުނުވެ ތާވަލުގެ އެންމެ ފުލުގައެވެ.
ކިޔުންތެރިންގެ ހިޔާލު