ބައިނަލްއަޤްވާމީ ރަހްމަތްތެރި ކަމުގެ ފުޓްބޯޅަ މެޗެއްގައި ރާއްޖެއިން ކިރްގިސްޠާނާ ދެކޮޅަށް މިރޭ ކުޅޭނެއެވެ.
މިމެޗް ފަށާނީ ކިރްގިސްޠާންގެ ވެރިރަށް ބިޝްކެކުގައި ރާއްޖޭ ގަޑިން 19:00 ގައެވެ.
މިއީ ބައިނަލްއަޤްވާމީ ފެންވަރުގައި މި ދެ ޓީމު ބައްދަލުކުރާ ފަސްވަނަ ފަހަރެވެ. މީގެކުރިން ދެ ޤައުމުން ވާދަކުރި ހަތަރު ފަހަރުގެ ތެރެއިން ކޮންމެ ގައުމަކުން ވެސް ވަނީ ދެ މެޗު ކާމިޔާބުކޮށްފައެވެ.
ރާއްޖެއިން ކިރްގިސްތާނާ ދެކޮޅަށް އެންމެ ފުރަތަމަ ކުޅުނީ 1997 ވަނަ އަހަރުގެ ޖޫން މަހު ބޭއްވި ވޯލްޑް ކަޕް ކޮލިފައިންގައެވެ. އެ ފަހަރުގެ ދެ މެޗު ވެސް ކާމިޔާބުކުރީ ކިރްގިސްޠާނެވެ. އޭގެފަހުން 2011 އަދި 2014 ވަނަ އަހަރު ކުޅުނު ދެ މެޗު ކާމިޔާބުކުރީ ރާއްޖެއިންނެވެ.
ފަހަކަށް އައިސް ކިރްގިސްޠާން ފުޓުބޯޅައިގައި ބޮޑެތި ކުރިއެރުންތަކެއް ހޯދަމުންދާއިރު، ރާއްޖޭގެ ފުޓުބޯޅައަށް ވަނީ އެކި ސަބަބުތަކާ ހުރެ އުނދަގޫ ހާލަތްތަކެއް ތަހައްމަލުކުރަން ޖެހިފައެވެ. އެހެންނަމަވެސް، އެފްއޭއެމްގެ އައު އިސްނެގުމުގެ ދަށުން ދިވެހި ފުޓުބޯޅަ އަލުން ކޮޅަށް ޖެހުމަށްޓަކައި، މި ބްރޭކުގައި ކުޅެން ރާވާފައިވާ ތިން މެޗަކީ ވެސް ރޭންކިންގެ ގޮތުން މާ މަތީގައިވާ ވަރުގަދަ ޓީމުތަކާ ދެކޮޅަށް ކުޅެ މުހިންމު ތަޖުރިބާތަކެއް ހޯދުމުގެ މަޤްޞަދުގައި ހަމަޖައްސާފައިވާ މެޗުތަކެކެވެ. މިގޮތުން ފުރަތަމަ މެޗުގައި ކުޅުނީ ޗައިނާއާ ދެކޮޅަށެވެ. ޗައިނާ އަތުން ރާއްޖެ ބަލިވީ 3-0 އިންނެވެ. ތިންވަނަ މެޗުގައި ރާއްޖެ ނިކުންނާނީ ލުބްނާނާ ދެކޮޅަށެވެ.
ކިޔުންތެރިންގެ ހިޔާލު