ލޯކަލް ގަވަމެންޓް އޮތޯރިޓީ (އެލްޖީއޭ) ގެ ރައީސްގެ މަގާމަށް މިނިސްޓަރު އޮފް ފިނޭންސް ހަސަން ޒަރީރު، ރައީސުލްޖުމްހޫރިއްޔާ މިއަދު އައްޔަނުކުރައްވައިފިއެވެ.
އެލްޖީއޭގެ ރައީސްގެ މަގާމުގައި މީގެ ކުރިން ހުންނެވީ މޫސާ ޒަމީރެވެ. ސިއްހީ ހާލަތާ ގުޅިގެން ފިނޭންސް މިނިސްޓަރުގެ މަގާމުން މޫސާ ޒަމީރު އިސްތިއުފާ ދެއްވުމާ ގުޅިގެން، އެލްޖީއޭގެ ރައީސްކަމުގެ މަގާމުން ވެސް އެމަނިކުފާނު ވަނީ ވަކިވެވަޑައިގެންފައެވެ. އެ މަގާމަށް އަލަށް އައްޔަނުކުރެއްވި ހަސަން ޒަރީރަކީ މާލީ ދާއިރާގައި ގިނަ ދުވަސްތަކެއް ވަންދެން ހިދުމަތްކުރައްވާފައިވާ ތަޖުރިބާކާރު ބޭފުޅެކެވެ.
ލޯކަލް ގަވަމެންޓް އޮތޯރިޓީގެ ބޯޑުގައި މިހާރު ތިއްބަވަނީ އެ އޮތޯރިޓީގެ ނައިބު ރައީސް ފާތިމަތު ނިއުމާ އާއި، ސީއީއޯ މުހައްމަދު ނިމާލްގެ އިތުރުން ބޯޑު މެންބަރުން ކަމުގައިވާ ފާތިމަތު ޒީނާ އަލީ، މުހައްމަދު އާޒާދު އަދި އަޒްހާ ޒަމީރެވެ. އެލްޖީއޭގެ މައިގަނޑު މަސްއޫލިއްޔަތަކީ ރާއްޖޭގެ ކައުންސިލްތަކުގެ މަސައްކަތްތަކާއި ހަރަކާތްތައް ހިނގަމުންދާ ގޮތް ބަލައި، އެ މަސައްކަތްތައް ވިލަރެސްކުރުމެވެ.
ހަސަން ޒަރީރަކީ މާލީ އަދި އިގްތިސާދީ ދާއިރާއިން މަތީ ތައުލީމު ހާސިލުކުރައްވައި، އެ ދާއިރާގައި ފުންނާބު އުސް ބޭފުޅެކެވެ. އެމަނިކުފާނު ވަނީ އިންޓަރނޭޝަނަލް އިސްލާމިކް ޔުނިވަރސިޓީ މެލޭޝިއާ އިން ބެޗްލަރ އޮފް އެކައުންޓިންގ އަދި މާސްޓަރ އޮފް ސައިންސް އިން ފައިނޭންސް ހާސިލުކުރައްވާފަ އެވެ. މީގެ އިތުރުން އިނގިރޭސިވިލާތުގެ ޗާޓަޑް އިންސްޓިޓިއުޓް އޮފް މެނޭޖްމަންޓް އެކައުންޓަންޓްސް އަދި ސީޕީއޭ އޮސްޓްރޭލިއާގެ ޕްރޮފެޝަނަލް ކޮލިފިކޭޝަންސް ވެސް އެމަނިކުފާނު ފުރިހަމަކުރައްވާފައިވެ އެވެ. މި މަގާމާ ހަވާލުވެވަޑައިގަތުމުގެ ކުރިން ޒަރީރު ހުންނެވީ މޯލްޑިވްސް އިންލޭންޑް ރެވެނިއު އޮތޯރިޓީ (މީރާ) ގެ ކޮމިޝަނަރ ޖެނެރަލް އޮފް ޓެކްސޭޝަންގެ މަގާމުގައެވެ.
ކިޔުންތެރިންގެ ހިޔާލު