ކާބޯތަކެތި ބަންދުކުރުމާއި ލޭބަލްކުރުމުގެ އައު ގަވާއިދެއް މޯލްޑިވްސް ފުޑް އެންޑް ޑްރަގް އޮތޯރިޓީން ގެޒެޓުކޮށް، ގަވާއިދާ ޚިލާފުވާ ފަރާތްތައް 1 މިލިއަން ރުފިޔާއާ ހަމައަށް ޖޫރިމަނާކުރެވޭނެކަން އިއުލާނުކޮށްފިއެވެ.
މި ގަވާއިދަށް އަމަލުކުރަން ފެށުމާއެކު، ކުރިން އަމަލުކުރަމުން އައި ޕްރީ-ޕެކޭޖްޑް ފުޑް ލޭބަލްކުރުމުގެ ގައުމީ މިންގަނޑު ވަނީ އުވާލާފައެވެ.
މި ގަވާއިދުގެ މައިގަނޑު މަގުސަދަކީ ކާބޯތަކެތި ބަންދުކުރުމާއި ލޭބަލްކުރުމުގެ ހަރުދަނާ މިންގަނޑުތަކެއް ކަނޑައެޅުމެވެ. އަދި ލޭބަލް ނުކޮށް ނުވަތަ އޮޅޭގޮތަށް ލޭބަލްކޮށްފައިވާ ކާބޯތަކެތި ވިއްކުން މި ގަވާއިދުގެ ދަށުން ވަނީ މަނާކޮށްފައެވެ. ވިޔަފާރިތަކަށް މި ބަދަލުތަކަށް އަމަލުކުރުމަށް 6 މަސްދުވަހުގެ މުއްދަތެއް ވަނީ ދީފައެވެ.
ލޭބަލްކުރުމުގެ ގަވާއިދާ ޚިލާފުވާ ފަރާތްތައް 10،000 ރުފިޔާއިން ފެށިގެން 1،000،000 ރުފިޔާއާ ދެމެދުގެ އަދަދަކުން ޖޫރިމަނާކުރުމުގެ ބާރު އޮތޯރިޓީއަށް ލިބިގެންވެއެވެ. ފަސް ފަހަރަށްވުރެ ގިނައިން ގަވާއިދާ ޚިލާފުވެއްޖެނަމަ، އެންމެ ބޮޑު އަދަދުން ޖޫރިމަނާކުރުމާއެކު ވިޔަފާރީގެ ހުއްދަ ބާތިލުކުރުމުގެ އިޚުތިޔާރު ލިބިގެންވެއެވެ. އޮޅުވާލައިގެން ލޭބަލްކޮށްފައިވާ ތަކެތި ވިއްކައިފިނަމަ 10،000 ރުފިޔާއާއި 750،000 ރުފިޔާއާ ދެމެދުގެ އަދަދަކުން ޖޫރިމަނާކުރެވޭނެއެވެ. އަދި ކުށުގެ ކުޑަބޮޑުމިނަށް ބަލައި ފުރަތަމަ ފަހަރަށް ކުރާ ކުށަކަށްވެސް އެންމެ ބޮޑު ޖޫރިމަނާ ކުރުމުގެ ބާރު ލިބިފައިވާއިރު، މިއީ ޖިނާއީ ކުށަކަށް ވާނަމަ ދައުވާކުރުމަށްވެސް ފޮނުވިދާނެއެވެ.
އައު ގަވާއިދުގެ ދަށުން ކާބޯތަކެތި ބަންދުކުރަންވާނީ ރައްކާތެރިކަން ކަށަވަރުކުރެވިފައިވާ މެޓީރިއަލް ބޭނުންކޮށްގެންނެވެ. މީގެ ތެރޭގައި އެއްފަހަރު ބޭނުންކުރާ ޕްލާސްޓިކް ފުޅި، ޚާއްސަކޮށް ޕެޓް ފުޅި ފަދަ ތަކެތި އަލުން ކާބޯތަކެތި ބަންދުކުރަން ބޭނުންކުރުން ވަނީ މަނާކޮށްފައެވެ. ބަންދުކުރާ ތަކެތީގެ މިންގަނޑާ ޚިލާފުވެއްޖެނަމަ 5،000 ރުފިޔާއާއި 100،000 ރުފިޔާއާ ދެމެދުގެ އަދަދަކުން ޖޫރިމަނާކުރެވޭނެއެވެ.
ކިޔުންތެރިންގެ ހިޔާލު