ފުވައްމުލަކު ސިޓީގެ ކަރަންޓުގެ ޚިދުމަތް ވަރުގަދަކުރުމަށް 1200 ކިލޯވޮޓުގެ ދެ ޖެންސެޓް ގެންގޮސްފި
ފުވައްމުލަކު ސިޓީއަށް ދެމެހެއްޓެނިވި ގޮތެއްގައި ކަރަންޓުގެ ޚިދުމަތް ފޯރުކޮށްދިނުމަށްޓަކައި ސަރުކާރުން ކުރަމުންދާ މަސައްކަތްތަކުގެ ތެރެއިން، 1200 ކިލޯވޮޓުގެ އައު ދެ ޖެންސެޓް އެ ސިޓީއަށް ގެންގޮސްފިއެވެ.
ފެނަކަ ކޯޕަރޭޝަނުން މައުލޫމާތު ދޭ ގޮތުގައި، ފުވައްމުލަކަށް ފޮނުވި މި ދެ ޖެންސެޓް މިހާރު ވަނީ އެ ސިޓީއަށް ބާލައިފައެވެ. މިއީ އެ ސިޓީގެ ކަރަންޓަށް ދިމާވެފައިވާ ދަތިތަކަށް ހައްލެއް ހޯދައިދީ، އިތުބާރު ހުރި ގޮތެއްގައި ޚިދުމަތް ދިނުމަށްޓަކައި ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ އިރުޝާދުގެ ދަށުން ކުރިއަށްދާ މަޝްރޫއެކެވެ.މި އައު ދެ ޖެންސެޓާއެކު ފުވައްމުލަކު ސިޓީގެ ކަރަންޓު އުފެއްދުމުގެ ގާބިލުކަން އިތުރުވެ،
ޕީކް ގަޑިތަކުގައި ދިމާވާ ދަތިތަކަށް ބޮޑު ލުޔެއް ލިބިގެންދާނެ ކަމަށް އެ ކުންފުނިން ބުނެއެވެ. ފެނަކައިން އަންނަނީ މި ޖެންސެޓްތައް އިންސްޓޯލްކޮށް، ވިއުގައާ ގުޅާލުމުގެ އަމަލީ މަސައްކަތްތައް އަވަސް ފުރުސަތެއްގައި ފެށުމަށް ތައްޔާރުވަމުންނެވެ.ސަރުކާރުގެ އަމާޒަކީ ރާއްޖޭގެ ހުރިހާ ރަށެއްގައިވެސް މެދުކެނޑުމެއް ނެތި، ފެންވަރު ރަނގަޅު ކަރަންޓުގެ ޚިދުމަތް ރައްޔިތުންނަށް ފޯރުކޮށްދިނުމެވެ.
މިގޮތުން ފުވައްމުލަކު ސިޓީއަށް މި ގެނެވުނު އައު ޖެންސެޓްތަކަކީ އެ ސިޓީގެ ތަރައްގީއަށާއި ރައްޔިތުންގެ ލާބައަށް އެޅުނު މުހިންމު ފިޔަވަޅެއްގެ ގޮތުގައި ފާހަގަކުރެވެއެވެ.
ކިޔުންތެރިންގެ ހިޔާލު