ފެނަކަ ކޯޕަރޭޝަންގެ މުވައްޒަފުން އަމިއްލައަށް ވަޒީފާއިން ވަކިވުމަށް ހުޅުވާލި ފުރުސަތުގައި، ހީކުރި ވަރަށްވުރެ ބޮޑު ތަރުހީބެއް ލިބެމުންދާކަމަށް އެ ކުންފުނީގެ މެނޭޖިންގ ޑިރެކްޓަރު މުހައްމަދު އަފީފު ވިދާޅުވެއްޖެއެވެ.
މި ޕްރޮގްރާމްގެ ދަށުން އަމިއްލައަށް ވަޒީފާ ދޫކޮށްލާ މުވައްޒަފުންނަށް ބަދަލެއްގެ ގޮތުގައި ހަތަރު މަހުގެ މުސާރަ ދިނުމަށް ވަނީ ހަމަޖެހިފައެވެ. ގާތްގަނޑަކަށް އަށްހާސް މުވައްޒަފުން މަސައްކަތްކުރާ ފެނަކައިން މި ފުރުސަތު ހުޅުވާލާފައިވަނީ ޖޫން މަހުގެ ދެވަނަ ދުވަހުއެވެ. އެ ކުންފުނީގެ ޗީފް ކޯޕަރޭޓް އޮފިސަރު އުސައިދު ހަސަން ސޮއިކުރައްވައި ނެރުއްވި މެމޯއެއްގައިވާ ގޮތުން، މިކަމަށް ޝައުގުވެރިވާ މުވައްޒަފުންނަށް ޖޫން މަހުގެ ސާދަވަނަ ދުވަހުގެ މެންދުރުފަހު 3 ޖެހުމާ ހަމައަށް އެޕްލިކޭޝަން ހުށަހެޅުމުގެ ފުރުސަތު ވަނީ ހުޅުވާލެވިފައެވެ.
މިހާތަނަށް ގިނަ އަދަދެއްގެ މުވައްޒަފުން ވަޒީފާއިން ވަކިވުމަށް ހުށަހަޅާފައިވީ ނަމަވެސް، އޭގެ ސީދާ އަދަދެއް ކުންފުނިން އަދި ހާމަކޮށްފައެއް ނުވެއެވެ. މެނޭޖިންގ ޑިރެކްޓަރު އަފީފު ވިދާޅުވީ، ވަކިވާ މުވައްޒަފުންގެ ޖުމްލަ އަދަދު އިއުލާނުކުރާނީ އެޕްލިކޭޝަން ހުށަހެޅުމުގެ މުއްދަތު ހަމަވުމުން ކަމަށެވެ.
ފެނަކައިން ހާމަކޮށްފައިވާ ގޮތުގައި މިއީ ކުންފުނީގެ ހިންގުން ހަރުދަނާކޮށް، މާލީ ގޮތުން ދެމެހެއްޓެނިވި ނިޒާމެއް ގާއިމުކުރުމަށް ފަށާފައިވާ މަސައްކަތުގެ ފުރަތަމަ މަރުހަލާއެވެ. އެގޮތުން، ރަށްރަށުގައި ހިންގާ މަޝްރޫއުތަކަށް ބޭނުންވާ ތަކެތި ނެތުމުގެ ސަބަބުން ގިނަ އަދަދެއްގެ މުވައްޒަފުންނަށް އެކަށީގެންވާ މަސައްކަތެއް ނުދެވި ތިބިކަން ކުންފުނިން ވަނީ ފާހަގަކޮށްފައެވެ.
މި ބަދަލާއެކު ކުންފުނީގެ އުފެއްދުންތެރިކަން އިތުރުވެ، ރައްޔިތުންނަށް ދެވޭ ހިދުމަތުގެ ފެންވަރު ރަނގަޅުވެގެންދާނެކަމަށް ފެނަކައިން ގަބޫލުކުރެއެވެ. އަދި މިއީ މުޅި ކުންފުނީގެ އޮނިގަނޑަށް ގެނެވޭ ބޮޑު ބަދަލެއްގެ ފެށުންކަމަށްވެސް އެ ކުންފުނިން ބުނެފައިވެއެވެ.
ކިޔުންތެރިންގެ ހިޔާލު