މޯލްޑިވްސް މަނިޓަރީ އޮތޯރިޓީ (އެމްއެމްއޭ)އިން އަލަށް އަމަލުކުރަން ފެށި ބޭރު ފައިސާ މާރުކުރުމުގެ ގަވާއިދުގެ ދަށުން، މިދިޔަ އަހަރުގެ ތެރޭގައި ރިސޯޓުތަކުން ބޭންކުތަކަށް ޖުމްލަ 671 މިލިއަން ޑޮލަރު މާރުކޮށްފައިވާކަމަށް އެ ބޭންކުގެ ތަފާސްހިސާބުތަކުން ދައްކައިފިއެވެ.
އެމްއެމްއޭއިން ނެރުނު 2025 ވަނަ އަހަރުގެ އަހަރީ ރިޕޯޓުގައިވާ ގޮތުން، ޖެނުއަރީ 2025 ގައި އަމަލުކުރަން ފެށި ބޭރު ފައިސާ މާރުކުރުމުގެ އާ ގާނޫނުގެ ދަށުން 182 ރިސޯޓަކުން ވަނީ އެމްއެމްއޭގައި ރަޖިސްޓްރީކޮށް ޑޮލަރު މާރުކުރަން ފަށާފައެވެ. އެ އުސޫލުތަކަށް ބަލާއިރު، ރިސޯޓުތަކަށް އަންނަ ކޮންމެ ފަތުރުވެރިއަކަށް 500 ޑޮލަރު ނުވަތަ ލިބޭ އާމްދަނީގެ 20 ޕަސަންޓް ބޭންކުތަކަށް މާރުކުރަން ޖެހޭއިރު، ގެސްޓްހައުސްތަކާއި ސަފާރީތަކުން ކޮންމެ ފަތުރުވެރިއަކަށް 25 ޑޮލަރު ނުވަތަ އާމްދަނީގެ 20 ޕަސަންޓް މާރުކުރަން ޖެހެއެވެ.
މީގެ އިތުރުން، ފަތުރުވެރިކަމުގެ ދާއިރާ ނޫން އެހެން ދާއިރާތަކުން މަދުވެގެން 15 މިލިއަން ޑޮލަރުގެ އާމްދަނީ ލިބޭ ވިޔަފާރިތަކުންވެސް ލިބޭ ފައިސާގެ 20 ޕަސަންޓް ބޭންކުތަކަށް މާރުކުރުމަށް އެ ގާނޫނު ލާޒިމުކުރެއެވެ.
ރިސޯޓުތަކުން ބޭންކުތަކަށް މާރުކުރާ ޑޮލަރުގެ ތެރެއިން 70 ޕަސަންޓް އެމްއެމްއޭއަށް ވިއްކަން މަޖުބޫރުކޮށްފައިވާއިރު، މިދިޔަ އަހަރު ބޭންކުތަކުން ވަނީ 523.4 މިލިއަން ޑޮލަރު އެމްއެމްއޭއަށް މާރުކޮށްފައެވެ. މިއީ ރިސޯޓުތަކުން މާރުކުރި ޖުމްލަ ފައިސާގެ 78 ޕަސަންޓެވެ.
އެ ބަދަލާއެކު ދައުލަތުގެ ރިޒާވަށް ހެޔޮ އަސަރެއް ކޮށްފައިވާކަން ފާހަގަކުރަމުން އެމްއެމްއޭއިން ބުނީ، ބާޒާރުގައި ޑޮލަރުގެ އަގު ހިފެހެއްޓުމަށް ބޭންކުތަކަށާއި އަސާސީ މުދާ ގަތުމަށް ދޫކުރި ޑޮލަރުގެ މިންވަރު 10 ޕަސަންޓަށް އިތުރުވެ، 1.1 ބިލިއަން ޑޮލަރަށް އަރާފައިވާ ކަމަށެވެ.
އެމްއެމްއޭއިން ފޯރުކޮށްދިން ޑޮލަރުގެ ތަފުސީލަށް ބަލާއިރު، ސަރުކާރުގެ ކުންފުނިތަކަށް އަސާސީ މުދާ ގެނައުމާއި ދަރަނި ދެއްކުމަށް 651 މިލިއަން ޑޮލަރު ދޫކޮށްފައިވެއެވެ. އަދި ބޭންކުތައް މެދުވެރިކޮށް އާންމުންނާއި ވިޔަފާރިތަކަށް 447.6 މިލިއަން ޑޮލަރު ފޯރުކޮށްދީފައިވާއިރު، ސީދާ ސަރުކާރުގެ ދަރަނި ދެއްކުމަށާއި ބޭސްފަރުވާގެ އެހީއަށް 436 މިލިއަން ޑޮލަރު ވަނީ ދޫކޮށްފައެވެ.
އިގްތިސޯދީ ދާއިރާއިން ރުފިޔާގެ އަގު ހިފެހެއްޓުމަށްޓަކައި، އިގްތިސޯދުގައި ދައުރުވާ ފައިސާގެ ތެރެއިން ތިން ބިލިއަން ރުފިޔާ އޯޕަން މާކެޓް އޮޕަރޭޝަންސް މެދުވެރިކޮށް އެމްއެމްއޭއިން ވަނީ އަނބުރާ ނަގާފައެވެ. މިއީ ބޭންކުތަކަށް ސެކިއުރިޓީ ވިއްކައިގެން ހިންގި ހަރަކާތެއް ނަމަވެސް، ބޭންކިން ނިޒާމުގައި ދައުރުވާ ރުފިޔާގެ މިންވަރު މިދިޔަ އަހަރު އިތުރުވެފައިވާކަން އެމްއެމްއޭގެ ރިޕޯޓުގައި ވަނީ ފާހަގަކޮށްފައެވެ.
މިދިޔަ އަހަރު ބޭންކުތަކަށް ފޯރުކޮށްދިން ޑޮލަރުގެ އަދަދަކީ އޭގެ ކުރީ އަހަރާ އަޅާބަލާއިރު 29 ޕަސަންޓް އިތުރު އަދަދެއްކަމަށްވެސް އެމްއެމްއޭގެ ތަފާސްހިސާބުތަކުން ދައްކައެވެ.
ކިޔުންތެރިންގެ ހިޔާލު