ބޭންކް އޮފް މޯލްޑިވްސް (ބީއެމްއެލް) ގެ ކާޑުތަކުން ކުރާ ބޭރު ފައިސާގެ މުއާމަލާތްތަކަށް މިހާރު ގެނެސްފައިވާ ލިމިޓްތަކަށް މި މަސް ނިމޭއިރު ބޮޑު ލުޔެއް ލިބޭނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ރައީސް ވިދާޅުވީ، ބޭންކަށް ދިމާވި ދަތިތަކަކާ ހުރެ ލިމިޓް ކުޑަކުރި ނަމަވެސް، އިއްޔެ ރައީސް އޮފީހުން މައުލޫމާތު ސާފުކުރިއިރު މަސް ނިމޭއިރު ބޮޑުތަނުން ލުއިކޮށްދޭނެ ކަމުގެ އުންމީދީ އިޝާރާތެއް ލިބިފައިވާ ކަމަށެވެ.
ބީއެމްއެލްގެ ރުފިޔާ ކާޑުތަކުން ބޭރުގެ އޮންލައިން ވިޔަފާރިތަކަށް ލިމިޓް ގެންނަން ޖެހުނީ މެދުއިރުމަތީގެ މަސްރަހާ ގުޅިގެން ފަތުރުވެރިން އަންނަ އަދަދު ދަށްވެ، ބޭންކަށް ގަންނަން ލިބޭ ޑޮލަރު މަދުވުމުންނެވެ. ބޭންކުން މިހާރު އަމަލުކުރަނީ ކޮންމެ ދުވަހަކަށް ކަނޑައެޅޭ ވަކި ބަޖެޓެއްގެ ތެރެއިން ޑޮލަރު ވިއްކުމަށެވެ. ނަމަވެސް، ޑޮލަރު އެކައުންޓްތަކަށް ދޫކޮށްފައިވާ ކާޑުތަކުން އެއްވެސް ލިމިޓެއް ނެތި މުއާމަލާތް ކުރެވޭނެއެވެ.
މި ބަދަލުތަކުގެ ސަބަބުން ބޭރުގައި ކިޔަވާ ދަރިވަރުންގެ ލިމިޓްތަކަށް އެއްވެސް ބަދަލެއް ނާންނާނެ ކަމުގެ ޔަގީންކަން ބީއެމްއެލްއިން ވަނީ ދީފައެވެ. ބެލެނިވެރިންގެ ކާޑު ބޭނުންކުރާ ދަރިވަރުންނަށް ސްޓޫޑަންޓް ކާޑު ހެއްދުމަށް ތިން މަސްދުވަހުގެ މުހުލަތެއް ދީފައިވާއިރު، ބޭންކުން ބުނީ މިއީ ޒަރޫރީ ބޭނުންތަކަށް ޑޮލަރު އިގްތިސާދު ކުރަން އެޅި ފިޔަވަޅެއް ކަމަށާއި، ޑޮލަރު ލިބޭ މިންވަރު އިތުރުވުމުން ލިމިޓްތައް އުވާލަމުންދާނެ ކަމަށެވެ.
ކިޔުންތެރިންގެ ހިޔާލު