މިއަހަރުގެ ޙައްޖުގެ އަޅުކަމުގައި ބައިވެރިވާ ދިވެހި ޙައްޖުވެރިން ސައުދީ އަރަބިއްޔާ ގަޑިން މިރޭ 21:00 އިން ފެށިގެން އަރަފާތަށް ދިއުމަށް ދަތުރުފަށާނެކަމަށް މޯލްޑިވްސް ޙައްޖު ކޯޕަރޭޝަނުން ހާމަކޮށްފިއެވެ.
ޙައްޖު ކޯޕަރޭޝަންގެ މެނޭޖިންގ ޑިރެކްޓަރ މުޙައްމަދު ޝަކީލް ‘އެކްސް’ ގައި ކުރެއްވި ޕޯސްޓެއްގައި ވިދާޅުވީ، އެ ކޯޕަރޭޝަންގެ ޙަވާލުގައި މިއަހަރު ޙައްޖަށް ގޮސްތިބި އެންމެހާ ޙައްޖުވެރިން މިރޭ ފުރާނެ ކަމަށެވެ. އަދި އުއްމީދު ކުރައްވަނީ މިރޭ ފަތިސްވުމުގެ ކުރިން ހުރިހާ ޙައްޖުވެރިންނަށް އަރަފާތަށް ވަދެވޭނެކަމަށް އޭނާ ވިދާޅުވިއެވެ. މީގެ އިތުރުން، މިއަހަރު ޙައްޖުގެ އަޅުކަމުގައި ބައިވެރިވާ އެންމެހާ މުސްލިމުންނަށް މަބްރޫރު ޙައްޖެއް މިންވަރުކުރެއްވުން އެދިވަޑައިގެން އޭނާ ވަނީ ދުޢާކުރައްވާފައެވެ.
މިއަހަރު ދިވެހިރާއްޖެއިން އަމީރުލްޙައްޖުގެ ގޮތުގައި ރައީސުލްޖުމްހޫރިއްޔާ ކަނޑައަޅުއްވާފައިވާ މިނިސްޓަރ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑް މުޙައްމަދު ސަޢީދު ވަނީ ދިވެހި ޙައްޖުވެރިންނާ ބައްދަލުކުރައްވާފައެވެ. މި މަހުގެ 22 ވަނަ ދުވަހު މި ބައްދަލުވުން ބާއްވާފައިވަނީ ދިވެހި ޙައްޖުވެރިން ތިބޭ ބަލަދް އައްޠައްޔިބު އަޖިޔާދު ހޮޓެލުގައެވެ. މި ބައްދަލުކުރެއްވުމުގައި ދިވެހިރާއްޖޭގެ ޙައްޖު މިޝަންގެ މެންބަރުންނާއި، ޙައްޖު ކޯޕަރޭޝަންގެ އިސްވެރިންގެ އިތުރުން ގިނަ ޢަދަދެއްގެ ޙާޖީން ބައިވެރިވިއެވެ.
މިނިސްޓަރު ސަޢީދުގެ މި ޒިޔާރަތުގައި ވަނީ ވަކިވަކިން ޙާޖީންނާ ބައްދަލުކުރައްވައި އެމީހުންގެ ޙާލު އޮޅުންފިލުއްވާފައެވެ. އަދި ދިވެހި ޙައްޖުވެރިންގެ ކަންކަން ސަރުކާރުން ވަރަށް ގާތުން ބައްލަވަމުންދާކަން ފާހަގަކުރައްވައި، އިންތިޒާމްތައް އެންމެ ރަނގަޅަށް ހަމަޖެއްސުމުގެ މަސައްކަތް ސަރުކާރުން ކުރަމުންދާކަމުގެ ޔަޤީންކަން އެމަނިކުފާނު ދެއްވިއެވެ.
ޙައްޖުވެރިންގެ ޞިއްޙީ ޙާލަތާއި އެހެނިހެން ކަންކަންޙައްޖުވެރިން ތިބޭ ހޮޓަލުގެ އެންމެހާ އިންތިޒާމްތައްވެސް މިނިސްޓަރު ބައްލަވާލެއްވިއެވެ. އެގޮތުން، ޞިއްޙީ ޚިދުމަތްތައް ރޭވިފައިވާ ގޮތްތަކާއި ކްލިނިކުގެ އިންތިޒާމްތައް ބައްލަވާލައްވައި، އެތަނުގައި ޙަރަކާތްތެރިވާ މެޑިކަލް ޓީމާ ބައްދަލުކުރެއްވިއެވެ. ހަމައެއާއެކު، ޙައްޖު ކޯޕަރޭޝަންގެ މުވައްޒަފުންނާވެސް އެމަނިކުފާނު ބައްދަލުކުރައްވައި މަޝްވަރާކުރެއްވިއެވެ.
މިއަހަރުގެ ޙައްޖުގެ އަޅުކަމުގައި ރާއްޖެއިން ޖުމްލަ 1000 ޙައްޖުވެރިން ބައިވެރިވާއިރު، އެންމެހާ ދިވެހި ޙައްޖުވެރިންގެ ޙާލަތުވެސް ރަނގަޅުކަމަށް ހައްޖު ކޯޕަރޭޝަނުން މަޢުލޫމާތުދެއެވެ.
ކިޔުންތެރިންގެ ހިޔާލު