ފުރަތަމަ ޓާމްގެ ސްކޫލް ޗުއްޓީއާ ދިމާކޮށް، މޯލްޑިވްސް ހައްޖު ކޯޕަރޭޝަންގެ ހަވާލުގައި 600 މީހުން އުމްރާގެ އަޅުކަމަށް ފުރުމަށް ހަމަޖެހިފައިވާއިރު، އޭގެ ތެރެއިން ތިންވަނަ ގްރޫޕް މިހާރު ވަނީ މައްކާއަށް ގޮސްފައެވެ.
މި ފަހަކަށް އައިސް ސްކޫލް ބަންދުތަކާ ދިމާކޮށް ރާއްޖެއިން އުމްރާގެ އަޅުކަމަށް މައްކާއަށްދާ ފަރާތްތަކުގެ އަދަދު ވަނީ ވަރަށް ބޮޑަށް އިތުރުވެފައެވެ. އެގޮތުން މިދިޔަ އަހަރުގެ ބޮޑު ޗުއްޓީއާ ދިމާކޮށް ވެސް 7000 އަށްވުރެ ގިނަ ދިވެހިން އުމްރާއަށް ގޮސްފައިވާއިރު، މިހާރު ފެށިފައިވާ ޗުއްޓީގައި ވެސް ގިނަ އަދަދެއްގެ ދިވެހިން އަންނަނީ އުމްރާއަށް ފުރަމުންނެވެ. ހައްޖު ކޯޕަރޭޝަނުން މައުލޫމާތުދޭ ގޮތުގައި އެ ކުންފުނީގެ ފަރާތުން ފުރަން ހަމަޖެހިފައިވާ 600 މީހުންގެ ތެރެއިން ގިނަ ބަޔަކު މިހާރު ވަނީ ސައުދީ އަރަބިއްޔާއަށް އެތެރެވެފައެވެ. އުމްރާއަށް ގޮސް އުޅޭ ބައެއް ދިވެހިން ބުނާ ގޮތުގައި މި ވަގުތު މައްކާގެ މަގުތަކާއި ހަރަމްފުޅުގެ ސަރަހައްދުން ދިވެހީން ވަރަށް ގިނައިން ފެންނަމުންދެއެވެ.
ގިނަ އަދަދެއްގެ ދިވެހިން އުމްރާގެ އަޅުކަމަށް ގޮސްފައިވާއިރު، އެނބުރި އަންނަ މީހުންގެ ފަރާތުން ބަލިތައް ފެތުރުން ކުޑަކުރުމަށް އެޗްޕީއޭއިން ވަނީ ހާއްސަ އިރުޝާދުތަކެއް ދީފައެވެ. އުމްރާއިން އެނބުރި އަންނައިރު ގިނަ މީހުންނަށް އަރިދަފުސް ރޯގާ ޖެހިފައި ތިބޭކަން ފާހަގަކުރެވޭތީ، ބަލިޖެހިއްޖެ ނަމަ އެކަމަށް ސަމާލުވުމަށާއި، ކެއްސައި ކިނބިހި އަޅާއިރު އަނގަމައްޗާއި ނޭފަތް ނިވާކުރުމަށް އެ އެޖެންސީން އިލްތިމާސްކުރެއެވެ. މީގެ އިތުރުން ރާއްޖެ އަންނަތާ 14 ދުވަހުގެ ތެރޭގައި ހުން އައުމާއި، ކެއްސައި ނޭވާލާން އުނދަގޫވުން ފަދަ ކަމެއް ދިމާވެއްޖެ ނަމަ، ލަސްނުކޮށް ޑޮކްޓަރަށް ދެއްކުމަށް ވެސް ވަނީ އަންގާފައެވެ.
ކިޔުންތެރިންގެ ހިޔާލު