ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ ބައި އިލެކްޝަންގައި ސަރުކާރު ހިންގާ ޕާޓީ، ޕީއެންސީގެ ފަރާތުން ވާދަކުރައްވާ ކެންޑިޑޭޓް އަހްމަދު ސައީދުގެ ކެމްޕޭން ހަރަކާތްތައް ފޯރިއާއެކު ކުރިއަށް އެބަދެއެވެ.
ހިތަދޫގައި ކުރިއަށްދާ މި ކެމްޕޭން ހަރަކާތްތަކުގައި ޕީއެންސީގެ އެންމެ އިސް ސަފުގައި ހިމެނިވަޑައިގަންނަވާ ބޭފުޅުން އަންނަނީ އަމަލީ ގޮތުން ބައިވެރިވެވަޑައިގަންނަވަމުންނެވެ. މިގޮތުން ރައްޔިތުންގެ މަޖިލީހުގެ ރައީސް އަދި ޕީއެންސީގެ ޗެއާޕާސަން އަބްދުއްރަހީމް އަބްދުﷲ އާއި، ޕީއެންސީގެ ނައިބު ރައީސް އަދި ފިޝަރީޒް މިނިސްޓަރު އަހްމަދު ޝިޔާމްގެ އިތުރުން ޔޫތު މިނިސްޓަރު އަބްދުﷲ ރާފިއު ހިމެނިވަޑައިގަންނަވައެވެ. މި ބޭފުޅުން ގެންދަވަނީ ކެންޑިޑޭޓް އަހްމަދު ސައީދާއެކު ދޮރުން ދޮރަށް ހިންގަވައި، ރައްޔިތުންނާ ބައްދަލުކުރައްވައި، ރައްޔިތުންނަށް ދިމާވެފައިވާ ދަތިތަކާއި ކަންބޮޑުވުންތައް އޮޅުންފިލުއްވަމުންނެވެ.
މިދިޔަ ހަފުތާގައި ހިތަދޫގައި ބޭއްވި ކެމްޕޭން ޖަލްސާއެއްގައި ވާހަކަދައްކަވަމުން އަހްމަދު ސައީދު ވަނީ އޭނާގެ ސިޔާސީ ތަސައްވުރު ވަރަށް ސާފުކޮށް ހާމަކުރައްވާފައެވެ. ސައީދު ވިދާޅުވި ގޮތުގައި މަޖިލިސް މެންބަރުން މަސައްކަތް ކުރަންވާނީ ހަމައެކަނި ވަކި ޕާޓީއެއްގެ ކުރިއެރުމަކަށް ނޫނެވެ. އޭގެ ބަދަލުގައި ކޮންމެ މެންބަރެއްގެ ވެސް އެންމެ ބޮޑު އަމާޒަކަށް ވާންޖެހޭނީ އެ މީހަކު ނިސްބަތްވާ ދާއިރާއާއި މުޅި ސަރަހައްދުގެ ތަރައްގީ ކަމަށް އޭނާ ފާހަގަކުރެއްވިއެވެ. އަދި ސަރުކާރުން ކުރިއަށްގެންދާ ތަރައްގީގެ މަސައްކަތްތަކަށް އެއްބާރުލުން ނުދީ، ހަމައެކަނި ފާޑުކިޔުމަކީ ގޯހެއް ކަމަށް ވެސް ސައީދު ވިދާޅުވިއެވެ.
ކެންޑިޑޭޓުންގެ ތަޖުރިބާއާއި އިންތިޚާބުގެ ވާދަވެރިކަންޕީއެންސީގެ ޓިކެޓުގައި ވާދަކުރައްވާ އަހްމަދު ސައީދަކީ ކުރިން ހިތަދޫ މޫލެކެޑެ ދާއިރާގެ ކައުންސިލަރުކަން ކުރައްވާފައިވާ، ރައްޔިތުންނާ ގާތުން މަސައްކަތްކުރެއްވުމުގެ ތަޖުރިބާ ލިބިވަޑައިގެންފައިވާ ބޭފުޅެކެވެ.
އަނެއްކޮޅުން، މި ބައި އިލެކްޝަންގައި އިދިކޮޅު އެމްޑީޕީގެ ފަރާތުން ވާދަކުރައްވަނީ އައްޑޫ ސިޓީގެ ކުރީގެ މޭޔަރު އަބްދުﷲ ސޯދިގުއެވެ. މި ދެ ބޭފުޅުންނަކީ ވެސް އައްޑޫ ސިޓީގެ ސިޔާސީ އަދި އިޖުތިމާއީ ކަންކަމުގައި ފުޅާ ދާއިރާއެއްގައި މަސައްކަތްކުރައްވާފައިވާ ދެ ބޭފުޅުން ކަމަށްވުމާއެކު، ކުރިއަށް އޮތް ބައި އިލެކްޝަންގެ ވާދަވެރިކަން ވަނީ ވަރަށް ބޮޑުވެފައެވެ.
ކިޔުންތެރިންގެ ހިޔާލު