ރާއްޖޭގެ ކުރިއާލާ އިންޒާރުދޭ ނިޒާމު ހަރުދަނާކުރުމަށް ހިންގާ ތައްޔާރު މަޝްރޫޢުގެ ދަށުން މޯލްޑިވްސް މީޓިއޮރޮލޮޖިކަލް ސާވިސްއަށް ތިން އިލެކްޓްރިކް އުޅަނދު ރަސްމީކޮށް ހަވާލުކޮށްފިއެވެ.
ތިމާވެއްޓާ ރައްޓެހި އުޅަނދުތަކާއި މުއައްސަސާގެ އޮޕަރޭޝަންހުޅުލޭގައި ހުންނަ މޯލްޑިވްސް މީޓިއޮރޮލޮޖިކަލް ސާވިސްގެ މައި މަރުކަޒުގައި ބޭއްވި ރަސްމިއްޔާތެއްގައި މި އުޅަނދުތައް ވަނީ އެ މުއައްސަސާއާ ހަވާލުކޮށްފައެވެ.
މިއީ މޫސުމާބެހޭ އިދާރާގެ އޮޕަރޭޝަނަލް އަދި އަމަލީ މަސައްކަތްތައް އިތުރަށް ހަލުވިކޮށް، ތިމާވެއްޓާ ރައްޓެހި ގޮތެއްގައި ދަތުރުފަތުރުގެ ކަންކަން ހަމަޖެއްސުމުގެ މަޤްސަދުގައި ފޯރުކޮށްދިން އުޅަނދުތަކެކެވެ. މިއީ މޫސުމީ ބަދަލުތަކަށް ނުފޫޒު ފޯރުވާ ކަންކަން މަދުކުރުމަށާއި، ދެމެހެއްޓެނިވި ގޮތެއްގައި މުއައްސަސާގެ ޚިދުމަތްތައް ކުރިއަށް ގެންދިއުމަށް އެޅުނު ވަރަށް މުހިންމު ފިޔަވަޅެއްކަމަށް ކަމާބެހޭ ފަރާތްތަކުން ހާމަކުރެއެވެ.
“ތައްޔާރު” މަޝްރޫޢަކީ ޗައިނާ ސަރުކާރުގެ ގްލޯބަލް ޑިވެލޮޕްމަންޓް އެންޑް ސައުތް-ސައުތް ކޯޕަރޭޝަން ފަންޑުގެ މާލީ އެހީތެރިކަމާއެކު، ޔޫއެންޑީޕީ މޯލްޑިވްސް އަދި ޗައިނާ އިންޓަނޭޝަނަލް ޑިވެލޮޕްމަންޓް ކޯޕަރޭޝަން އެޖެންސީ ގުޅިގެން ކުރިއަށްގެންދާ މުހިންމު މަޝްރޫޢެކެވެ. މި މަޝްރޫޢުގެ މައިގަނޑު މަޤްސަދަކީ ރާއްޖޭގެ މޫސުން މޮނިޓާކޮށް ލަފާކުރުމުގެ ފަންނީ ޤާބިލުކަން އިތުރުކުރުމާއި، ކުރިއާލާ އިންޒާރު ދޭ މަޢުލޫމާތު އާންމުންނަށް ފަސޭހައިން ލިބޭނެ އިންތިޒާމު ހަމަޖެއްސުމެވެ.
މި މަޝްރޫޢުގެ ދަށުން ރާއްޖޭގެ އެކި ހިސާބުތަކުގައި މޫސުން މޮނިޓާކުރާ އާ މަރުކަޒުތައް ޤާއިމުކުރުމާއި، މޫސުމީ މަޢުލޫމާތު އެއްކޮށް ދިރާސާކުރުމުގެ ނިޒާމުތައް އިތުރަށް ވަރުގަދަކުރުން ހިމެނެއެވެ. މީގެ އިތުރުން، މޫސުމާބެހޭ އިދާރާގެ ބްރޭންޑް އާކޮށް، މަޢުލޫމާތު ފޯރުކޮށްދޭ ޑިޖިޓަލް ޕްލެޓްފޯމްތައް ކަމަށްވާ ވެބްސައިޓާއި މޯބައިލް އެޕްލިކޭޝަން ތަރައްޤީކުރުމުގެ މަސައްކަތްވެސް މި މަޝްރޫޢުގެ ތެރެއިން ވަނީ ކުރިއަށް ގެންގޮސްފައެވެ.
މި މަޝްރޫޢު އިފްތިތާހުކުރުމަށް ބޭއްވި ޖަލްސާގައި ވާހަކަފުޅު ދައްކަވަމުން އެންވަޔަރަންމަންޓް، ކްލައިމެޓް ޗޭންޖް އެންޑް އެނަރޖީ މިނިސްޓަރުކަން ކުރައްވާފައިވާ ތޯރިޤް އިބްރާހީމް ވަނީ، މިއީ މޫސުމީ ބަދަލުތަކުން ކުރިމަތިވާ ނުރައްކާތަކުން ރާއްޖޭގެ ރައްޔިތުން ސަލާމަތްކުރުމަށް އެޅޭ ވަރަށް މުހިންމު ފިޔަވަޅެއްކަން ފާހަގަކުރައްވާފައެވެ. އަދި މި މަޝްރޫޢުގެ ސަބަބުން ކާރިސާތަކަށް ތައްޔާރުވުމަށް ލިބޭ ވަގުތު އިތުރުވެ، ރައްޔިތުންގެ ރައްކާތެރިކަން ކަށަވަރުވެގެންދާނެކަންވެސް އެމަނިކުފާނު ވަނީ ފާހަގަކުރައްވާފައެވެ.
ކިޔުންތެރިންގެ ހިޔާލު