ލޯކަލް ކައުންސިލްތަކުގެ ރައީސުންނާއި މެންބަރުންގެ މުސާރަ މިހާރަށްވުރެ ބޮޑުކުރުމަށް، ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް (ކުޑޫ) މަޖިލީހަށް ހުށަހަޅުއްވައިފިއެވެ.
މަޖިލީހުގެ ރައީސް އަބްދުއްރަހީމް އަބްދުﷲ އަށް މި މަހުގެ 11 ވަނަ ދުވަހު ފޮނުއްވި ސިޓީއެއްގައި މެންބަރު ކުޑޫ އެދިވަޑައިގެންފައިވަނީ، ކައުންސިލަރުންގެ މުސާރަ ބޮޑުކުރުމުގެ މައްސަލަ މަޖިލީހުގެ ކަމާބެހޭ ކޮމިޓީ މެދުވެރިކޮށް ދިރާސާކޮށްދެއްވުމަށެވެ. އެގޮތުން ކައުންސިލްގެ ރައީސަށް 45،000 ރުފިޔާ، ނައިބުރައީސަށް 35،000 ރުފިޔާ އަދި ކައުންސިލް މެންބަރަކަށް 25،000 ރުފިޔާ މުސާރައިގެ ގޮތުގައި ހަމަޖައްސަވައިދެއްވުމަށް އޭނާ ވަނީ ހުށަހަޅުއްވާފައެވެ.
އެ ބަދަލު ގެންނަން ހުށަހެޅުއްވި މައިގަނޑު ސަބަބެއްގެ ގޮތުގައި ކުޑޫ ފާހަގަކުރެއްވީ، ކައުންސިލްތަކުގެ އިދާރީ ބައެއް މުވައްޒަފުންގެ މުސާރަ، ރައްޔިތުންގެ ސީދާ ވޯޓުން އިންތިހާބުކޮށްފައި ތިބޭ ކައުންސިލަރުންނަށްވުރެ ބޮޑުވުމެވެ. ކައުންސިލްގެ ރައީސަށްވުރެ ސެކްރެޓަރީ ޖެނެރަލްގެ މުސާރަ ބޮޑުކަމަށާއި، ނައިބުރައީސަށްވުރެ ކައުންސިލް އެގްޒެކެޓިވްއެއްގެ މުސާރަ ބޮޑުކަމަށް އޭނާ ވިދާޅުވިއެވެ.
އެކަމުގެ ސަބަބުން ކައުންސިލަރުންނަކީ އިދާރީ މުވައްޒަފުންނަށްވުރެ ދަށް ފަންތީގެ ބައެއްގެ ގޮތުގައި ބެލެވޭކަމަށް ކުޑޫ ވިދާޅުވިއެވެ. މިއީ އިންތިހާބީ އޮފިޝަލުންގެ ބާރުވެރިކަމަށް އުނިކަން އައިސް، އިދާރީ މުވައްޒަފުން މެދުވެރިކޮށް ކަންކަން ތަންފީޒުކުރުމަށް ދަތިތަކާ ކުރިމަތިވާ ކަމެއް ކަމަށްވެސް އޭނާ ވިދާޅުވިއެވެ.
އެ ހުށަހެޅުން މަޖިލީހަށް ހުށަހަޅާފައި މިވަނީ، އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ ރައީސުންގެ މުސާރަ ބޮޑުކުރަން ނޭޝަނަލް ޕޭ ކޮމިޝަނުން ނިންމާފައި ވަނިކޮށެވެ.
ޕޭ ކޮމިޝަނުގެ އާ ނިންމުމުގެ ދަށުން، ސިޓީތަކުގެ އަންހެނުންގެ ކޮމިޓީ ރައީސުންގެ މުސާރަ 41,500 ރުފިޔާއަށް އަދި ރަށްރަށުގެ ކޮމިޓީ ރައީސުންގެ މުސާރަ 21,000 ރުފިޔާއަށް ބޮޑުވެގެންދާނެއެވެ. މިހާރު މި ކޮމިޓީތަކުގެ ރައީސުންނަށް މުސާރައިގެ ގޮތުގައި ލިބެނީ މަހަކު 6،000 އާއި 7،000 ރުފިޔާއާ ދެމެދުގެ އަދަދެކެވެ.
ކިޔުންތެރިންގެ ހިޔާލު