ކުރީގެ އިމިގްރޭޝަން ކޮންޓްރޯލަރ ޖެނެރަލް މުހައްމަދު ޝަމްއާން ވަހީދުގެ މައްޗަށް އުފުލާފައިވާ ކޮރަޕްޝަންގެ މައްސަލައިގެ ހުކުމް ކުރުމަށް ބުރާސްފަތި ދުވަހު ބޭއްވުމަށް ހަމަޖެހުނު އަޑުއެހުން ކްރިމިނަލް ކޯޓުން ކެންސަލްކޮށްފިއެވެ.
ޝަމްއާންގެ މައްޗަށް ކުރެވޭ ތުހުމަތުތައްޝަމާންގެ މައްޗަށް ދައުލަތުން ވަނީ ބޮޑެތި ޖިނާއީ ދައުވާތަކެއް އުފުލާފައެވެ. އޭގެ ތެރޭގައި ފޭރުމުގެ ކުށުގައި ބައިވެރިވުމުގެ ދައުވާ ހިމެނޭއިރު، މި ކުށަށް ތިން އަހަރުގެ ޖަލު ހުކުމެއް އާދެއެވެ. މީގެ އިތުރުން، ނާޖާއިޒު ފައިދާ ހޯދައިދިނުމުގެ ކުށުގައި އެއް އަހަރުގެ ޖަލު ހުކުމެއް އަދި މަނީ ލޯންޑަރިންގެ ކުށުގައި ފަހަކުން ފަނަރަ އަހަރާ ދެމެދުގެ ޖަލު ހުކުމެއް އައުމުގެ ފުރުސަތު އޮވެއެވެ.
މި މައްސަލައިގެ އަޑުއެހުމެއް މިއަދުގެ މެންދުރު 01:00 ގައި ބޭއްވުމަށް ތާވަލުކުރިއެވެ. ކްރިމިނަލް ކޯޓުގެ ތަރުޖަމާނަކު ވިދާޅުވީ، ޝަމާންގެ ވަކީލު މިވަގުތު ރާއްޖެއިން ބޭރުގައި ހުންނެވުމުން، އެ އަޑުއެހުން ކެންސަލްކޮށްދިނުމަށް ޝަމްއާން އެދިވަޑައިގެންފައިވާ ކަމަށެވެ. އެހެންކަމުން ކޯޓުން ވަނީ އެ އަޑުއެހުން ފަސްކޮށްފައެވެ. އެ އަޑުއެހުމުގައި ހުކުމް ކުރުމަށް ތާވަލުކޮށްފައި އޮތްކަން ތަރުޖަމާނު ކަށަވަރުކޮށްދެއްވިއެވެ. މި މައްސަލައިގެ ހުކުމް ކުރާނެ އާ ތާރީޚެއް ކޯޓުން އަދި އިއުލާނުކޮށްފައެއް ނުވެއެވެ.
ޝަމްއާން އިމިގްރޭޝަންގެ ވެރިޔާގެ މަގާމުން ވަކިކުރީ 2025 ވަނަ އަހަރުގެ މާރިޗު މަހުގެ 20 ވަނަ ދުވަހުއެވެ. އޭނާ ވަކިކުރިތާ ކުޑަ ދުވަސްކޮޅެއްގެ ތެރޭގައި ފުލުހުން ބުނެފައިވަނީ، ބިދޭސީ މަސައްކަތްތެރިންގެ އަތުން ނާޖާއިޒު ފައިދާ ހޯދުމަށް އިމިގްރޭޝަންގެ ބައެއް މުވައްޒަފުން މަގާމުގެ ނުފޫޒު ބޭނުންކުރި މައްސަލައެއް ބަލަމުންދާ ކަމަށެވެ. އެރޭ ފުލުހުން ވަނީ މާލޭގައި ހުންނަ ޝަމާންގެ ގެ ބަލައި ފާސްކޮށް، 257,475 ރުފިޔާ، 10,000 ޑޮލަރު، ބޭރު ފައިސާތަކެއްގެ އިތުރުން އިލެކްޓްރޯނިކް އާލާތްތައް ހޯދާފައެވެ.
ކިޔުންތެރިންގެ ހިޔާލު