ދިވެހިރާއްޖޭގެ ޤައުމީ ދިފާޢީ ބާރުގެ ސަރވިސް ކޯރގެ ސްކޫލް އޮފް އިންޖިނިއަރިންގ އެންޑް ލޮޖިސްޓިކްސް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިފުތިތާޙުކޮށްދެއްވައިފިއެވެ.
މިނިސްޓްރީ އޮފް ޑިފެންސް އެންޑް ނޭޝަނަލް ސަރވިސް އިން މަޢުލޫމާތުދޭގޮތުގައި، ބ. ކިހާދޫގައި ޤާއިމުކުރެވިފައިވާ މި ސްކޫލަކީ ދިވެހިރާއްޖޭގެ ޤައުމީ ދިފާޢީ ބާރުގެ ފަންނީ އަދި ޢިލްމީ ޤާބިލުކަން ތަރައްޤީކުރުމަށްޓަކައި އުފެއްދި ސްކޫލެކެވެ. މިއީ ފަންނީ ގޮތުން ޤާބިލު ސިފައިން ބިނާކުރުމަށް ރާއްޖޭގައި އުފެދުނު މިފަދަ ފުރަތަމަ ތަމްރީނު ސްކޫލެވެ.
މި ސްކޫލްގެ އެންމެ މުހިންމު އެއް އަމާޒަކީ ރައީސުލްޖުމްހޫރިއްޔާގެ ޤައުމީ ޚިދުމަތުގެ އިސްނެންގެވުމުގެ ދަށުން ފަންނީ ތަމްރީނު ފޯރުކޮށްދިނުމެވެ. މިހާރުވެސް 35 ރަށަކުން 65 ދަރިވަރުން މި ސްކޫލުގައި އެންރޯލްކުރެވިފައިވާއިރު، މީގެ ތެރޭގައި ހިމެނެނީ އުމުރުން 16 އަހަރާއި 19 އަހަރާ ދެމެދުގެ 49 ފިރިހެން ދަރިވަރުންނާއި 16 އަންހެން ދަރިވަރުންނެވެ.
މި ސްކޫލުގައި ހިންގުމަށް ހަމަޖެހިފައިވާ ކޯސްތަކުގެ ތެރޭގައި އޮޓޯމޮބައިލް އިންޖިނިއަރިންގ، މެރިން އިންޖިނިއަރިންގ، އިލެކްޓްރިކަލް މަސައްކަތްތައް، ރިފްރިޖަރޭޝަން، ވެލްޑިންގ، އަދި އޮފީސް މެނޭޖްމަންޓް ހިމެނެއެވެ. ހަތަރު މަސްދުވަހުގެ މުއްދަތަށް ހިންގާ މި ޕްރޮގްރާމަކީ މޯލްޑިވްސް ކޮލިފިކޭޝަންސް އޮތޯރިޓީގެ ލެވެލް 3 ފެންވަރަށް ފާސްކުރެވިފައިވާ ޕްރޮގްރާމެކެވެ. މިއީ ވަޒީފާއަށާއި ވަޒީފާގެ ބާޒާރަށް ދަރިވަރުން ތައްޔާރުކުރުމުގެ މަޤުޞަދުގައި ފަރުމާކުރެވިފައިވާ ޕްރޮގްރާމެކެވެ.
ފަންނީ ތަޢުލީމުގެ އިތުރުން، މި ޕްރޮގްރާމުގައި އަޚުލާޤު، ޝަޚުޞިއްޔަތު ބިނާކުރުން، ގަޑިއަށް ފަރުވާތެރިވުން، ދީނީ ހޭލުންތެރިކަން އަދި ޤައުމީ ޚިދުމަތާ ގުޅޭ އަގުތަކަށްވެސް ޚާއްޞަ ސަމާލުކަމެއް ދެވޭނެއެވެ.
މި އިފުތިތާޙީ ރަސްމިއްޔާތުގައި އަސްކަރީ ތާރީޚާ ގުޅޭ ރިޕޯޓަކާއި ވީޑިއޯ ޕްރެޒެންޓޭޝަނެއް ދައްކާފައިވެއެވެ. އަދި ދިގު މުއްދަތަކަށް ޚިދުމަތްކުރެއްވި ސިފައިންނަށް ޚާއްޞަ މެޑެލް ހަވާލުކުރުންވެސް ކުރިއަށްދިޔައެވެ.
ކިޔުންތެރިންގެ ހިޔާލު