ފީއަލީ ބަނދަރުގައި ހިނގި މި ހާދިސާގައި އަނިޔާވި ބިދޭސީ މީހާ އައިޖީއެމްއެޗްގައި ފަރުވާދެމުން ދަނިކޮށް މަރުވެއްޖެއެވެ.
ފީއަލީ ބަނދަރުގައި އޮތް ތެޔޮ ބޯޓެއްގައި ރޯވި ކަމަށް ފުލުހުންނަށް ރިޕޯޓްކުރީ މި މަހުގެ ހަތަރު ވަނަ ދުވަހުގެ ހެނދުނު 09:15 ހާއިރު އެވެ. އެ ހާދިސާގައި އިތުރު ތިން އުޅަނދަކަށާއި، ރަށުގެ އައިސް ޕްލާންޓަށާއި ތެޔޮ ޝެޑަށް އަލިފާންގަނޑު ފެތުރުނު ފަހުން، މި ހާދިސާ ކޮންޓްރޯލް ކުރެވިފައިވަނީ ހެނދުނު 10:35 ހާއިރުއެވެ.
ހާދިސާގައި އެކަކަށް ވަނީ ވަރަށް ބޮޑަށް އަނިޔާވެފައެވެ. އެއީ ތެޔޮ ބޯޓުގައި މަސައްކަތްކުރާ އުމުރުން 40 އަހަރުގެ ބަންގްލަދޭޝް ރައްޔިތެއް ކަމަށްވާ ދެލޯވާ އެވެ. އޭނާގެ ހާލަތު ގޯސްވުމުގެ ސަބަބުން އިތުރު ފަރުވާއަށް އައިޖީއެމްއެޗަށް ބަދަލުކުރުމުގެ ކުރިން ފުރަތަމަ ފަރުވާ ދީފައިވަނީ ފީއަލީ ސިއްހީ މަރުކަޒުގައެވެ.
އައިޖީއެމްއެޗްގެ އިންޓެންސިވް ކެއަރ ޔުނިޓްގައި ވެންޓިލޭޓަރުގެ އެހީގައި ފަރުވާ ހޯދަމުން ދަނިކޮށް، މަރުވެފައިވާކަން އެ ހޮސްޕިޓަލުން ކަށަވަރުކޮށްދެއެވެ.
ދެލޯވާއަށް އެންމެ ފުރަތަމަ ފަރުވާދިން ފީއަލީ ސިއްހީ މަރުކަޒުން ބުނެފައިވާ ގޮތުގައި އޭނާގެ ހަށިގަނޑުގެ 60 އިންސައްތަ ވަނީ ފިހިފައެވެ.
އަލިފާން ރޯވާން މެދުވެރިވީ ތެޔޮ ހުސްކުރުމަށްޓަކައި ބޯޓު ކައިރިކޮށް، ޕަމްޕު ޖެއްސުމުގެ ތެރޭގައެވެ.
ކިޔުންތެރިންގެ ހިޔާލު