ބޭންކް އޮފް މޯލްޑިވްސް (ބީއެމްއެލް) އިން 300 މިލިއަން އެމެރިކާ ޑޮލަރާ ހަމައަށް ފައިސާ ހޯދުމުގެ މަޤްޞަދުގައި ބައިނަލްއަޤްވާމީ އިންވެސްޓަރުންނާ ބައްދަލުވުންތަކެއް ބާއްވަމުންދާ ކަމަށް ބްލޫމްބަރގް ނިއުސް އިން ރިޕޯޓުކޮށްފިއެވެ.
ބީއެމްއެލްގެ ޑިރެކްޓަރ ފޯރ ފައިނޭންޝަލް ސްޓްރެޓަޖީ އެންޑް ޕްލޭނިންގ، އަބްދުއްލާ ހަސަންއާ ހަވާލާދީ އެ ނޫހުގައި ބުނެފައިވަނީ، އެމެރިކާ ޑޮލަރުގެ ސުކޫކަކާ ގުޅޭގޮތުން ޚިޔާލު ހޯދުމަށް އޭޝިޔާ، މެދުއިރުމަތި އަދި ޔޫރަޕްގެ ފަންޑު މެނޭޖަރުންނާ ބޭންކުގެ އިސްވެރިން ބައްދަލުކުރައްވަމުން ގެންދަވާ ކަމަށެވެ.
ހަސަން ބްލޫމްބަރގް ނިއުސްއަށް މައުލޫމާތު ދެއްވި ގޮތުގައި، ބޭންކުން މަސައްކަތްކުރަމުން ދަނީ 300 މިލިއަން އެމެރިކާ ޑޮލަރާ ހަމައަށް ފައިސާ ހޯދުމަށެވެ. އަދި މި ފައިސާއަށް ދިވެހި ސަރުކާރުން ގެރެންޓީ ދޭނެއެވެ.
އިންވެސްޓަރުންގެ މި ބައްދަލުވުންތައް އިންތިޒާމުކުރުމުގައި އެހީތެރިވެދެނީ ދުބާއީގައި މައި އޮފީސް ހުންނަ މަޝްރެކްބޭންކް ޕީއެސްސީ އިންނެވެ.
މި މުއާމަލާތް ކާމިޔާބުވެއްޖެނަމަ، މިއީ ބީއެމްއެލް އިން ބައިނަލްއަޤްވާމީ ކެޕިޓަލް މާކެޓަށް ވަންނަ ފުރަތަމަ ފަހަރަށް ވެގެންދާނެއެވެ. އަދި މީގެ ސަބަބުން މެދުއިރުމަތީގެ ހަނގުރާމައިގެ ސަބަބުން ކުރާ ނޭދެވޭ އަސަރުތައް ކުޑަކުރުމަށް އެހީތެރިވެދޭނެއެވެ.
ފެބްރުއަރީ 28 ގައި ފެށުނު އެމެރިކާ އާއި އިސްރާއީލުން އީރާނާ ދެކޮޅަށް ކުރަމުންދާ ހަނގުރާމައިގެ ސަބަބުން ދަތުރުފަތުރަށް ބުރޫއަރައި ދުނިޔޭގެ ބާޒާރުގައި ތެލުގެ އަގުވަނީ އުފުލިފައެވެ. މިއީ ރާއްޖޭގެ އިޤްތިޞާދުގެ މައިގަނޑު އަސާސް ކަމަށްވާ ފަތުރުވެރިކަމަށް ލިބުނު ވަރަށް ބޮޑު ގެއްލުމެކެވެ.
މޫޑީސް ރޭޓިންގްސްގެ އެނަލިސްޓެއް ކަމަށްވާ މާކަސް ޔޫ، ބްލޫމްބަރގް ނިއުސްއަށް ވިދާޅުވީ ދަތުރުފަތުރަށް އައިސްފައިވާ ހުރަސްތަކާއި ތެލުގެ އަގު ބޮޑުވުމުގެ ސަބަބުން އިޤްތިޞާދީ ކުރިއެރުމަށް ހުރަސްއެޅުމުގެ އިތުރުން، ފަތުރުވެރިކަމުން ލިބޭ އާމްދަނީ ދަށްވެ އިމްޕޯޓު ބިލު ބޮޑުވުމާ ގުޅިގެން ބެލެންސް އޮފް ޕޭމަންޓަށް ފިއްތުންތައް ކުރިމަތިވާނެ ކަމަށެވެ.
އޭނާ އިންޒާރު ދެއްވި ގޮތުގައި މީގެ ސަބަބުން ބޭރުގެ ލިކުއިޑިޓީއަށް އަސަރުކޮށް، ބޭރު ފައިސާގެ ރިޒާވް ހީނަރުވެގެންދާނެއެވެ.
ހަސަން ބްލޫމްބަރގް ނިއުސްއަށް ވިދާޅުވީ، ހޯދަން މަސައްކަތްކުރާ ފައިސާއަކީ ފަތުރުވެރިކަމުގެ ދާއިރާއަށް މިހާރު ކުރިމަތިވެފައިވާ ގޮންޖެހުންތަކާ ސީދާ ގުޅުންހުރި ކަމެއް ނޫން ކަމަށާއި، ނަމަވެސް އެ ފައިސާގެ ސަބަބުން އިޤްތިޞާދުގެ ތެރޭގައި ދައުރުވާ ބޭރު ފައިސާގެ މިންވަރު އިތުރުވެގެންދާނެތީ އޭގެ ފައިދާ ކުރާނެ ކަމަށެވެ.
ވެލާނާ އިންޓަނޭޝަނަލް އެއަރޕޯޓް (ވީއައިއޭ) ގެ އާ އިންޓަނޭޝަނަލް ޕަސެންޖަރ ޓަރމިނަލްގެ ސަބަބުން އަހަރަކު 7 މިލިއަން ފަސިންޖަރުންނަށް ޚިދުމަތް ދިނުމުގެ ޤާބިލުކަން ލިބިފައިވުމާއެކު، ރިސޯޓު ތަރައްޤީކުރުމަށް އިތުރު ރަށްތައް ދޫކުރުމަށް ސަރުކާރުން ވަނީ ނިންމަވާފައެވެ.
ހަސަން ވިދާޅުވީ މިކަމަށް ބޭރު ފައިސާގެ ބޮޑެތި އިންވެސްޓްމަންޓްތަކެއް ބޭނުންވާނެ ކަމަށެވެ.
އޭނާ ވިދާޅުވީ ބޭންކަށް ޑޮލަރުން ފައިސާ ހޯދިއްޖެނަމަ، މިއީ އެ ދާއިރާއަށް ނުހަނު ބޭނުންތެރި ދަނޑިވަޅެއްގައި އިޤްތިޞާދުގެ ތެރެއަށް އާ ފައިސާ ވަދެގެންދާނެ ކަމެއް ކަމަށެވެ.
“މުޅި އިޤްތިޞާދަށް މި ލިކުއިޑިޓީގެ ފައިދާ ކުރާނެ، އަދި މިއީ ނުސީދާ ގޮތެއްގައި މި މައްސަލައަށް ހައްލެއް ގެނެސްދޭނެ ކަމެއް،\” އޭނާ ބްލޫމްބަރގް ނިއުސްއަށް ވިދާޅުވިއެވެ.
ފިނޭންސް މިނިސްޓްރީ މެދުވެރިކޮށް ދިވެހި ސަރުކާރުން ބީއެމްއެލްގެ 50.8 އިންސައްތަ ހިއްސާ ކޮންޓްރޯލްކުރާއިރު، ދައުލަތާ ގުޅުންހުރި އެހެން ކުންފުނިތަކުގެ ހިއްސާވެސް އެ ބޭންކުގައި އޮވެއެވެ.
މޫޑީސްގެ ޔޫ ވިދާޅުވީ، އިންވެސްޓަރުން ޝައުޤުވެރިކުރުމަށްޓަކައި ހުށަހަޅަންޖެހޭ އަގު މާބޮޑުވުމުގެ ސަބަބުން، ސަރުކާރަށް އަމިއްލައަށް މާކެޓުން ފައިސާ ހޯދުމުގެ ފުރުޞަތު އޮތް ކަމުގެ ނިޝާނެއް ފެންނަން ނެތް ކަމަށެވެ.
އޭޕްރީލް މަހު، ރާއްޖެއިން ވަނީ 500 މިލިއަން އެމެރިކާ ޑޮލަރުގެ ސުކޫކެއް ރީފައިނޭންސް ކުރުމުގެ ބަދަލުގައި ސީދާ ދައްކާ ޚަލާޞްކޮށްފައެވެ. މިއީ ކެޕިޓަލް މާކެޓަށް ވަނުމަށް ދަތިތަކެއް ހުރިކަން ދައްކުވައިދޭ ކަމެކެވެ. އަދި އިންޑިއާއަށް ދައްކަންޖެހޭ 400 މިލިއަން އެމެރިކާ ޑޮލަރުގެ ދަރަންޏެއްވެސް ވަނީ އަދާކޮށްފައެވެ.
ކިޔުންތެރިންގެ ހިޔާލު