ގަލްފްގެ ގައުމުތަކުގައި ހުރި އެމެރިކާއާއި އިސްރާއީލުގެ ތަންތަނަށް އީރާނުން ދެމުންގެންދާ ރައްދު ހަމަލާތައް ވަގުތުން ހުއްޓާލަން ގޮވާލައި އދގެ ސަލާމަތީ މަޖިލީހުން ގަރާރެއް ފާސްކުރި ފަހުންވެސް އީރާނުން ގެންދަނީ ހުއްޓާނުލާ ހަމަލާތައް ދެމުންނެވެ.
އީރާނުން މިރޭވަނީ، ޔޫއޭއީގެ އެކި ރަށްތަކުގައި ހުރި އެމެރިކާގެ ތަންތަނަށް ޑްރޯންއާއި ބެލިސްޓިކް މިސައިލުން ވަރުގަދަ ހަމަލާތަކެއް ދީފައެވެ.
މީގެއިތުރުން، އީރާނުންވަނީ ބަހްރެއިންގައި ހުރި އެމެރިކާގެ ތަންތަނަށާއި، ސައުދީ އަރަބިއްޔާގެ ޕްރިންސް ސުލްތާން އެއަރބޭސް އަށާއި، ގަތަރުގައި ހުރި އެމެރިކާގެ ބޭސްތަކަށާއި ތަންތަނަށްވެސް ވަރުގަދަ ހަމަލާތަކެއް ދިފައެވެ.
އީރާނުގެ ޑްރޯންއާއި މިސައިލް ހަމަލާތައް ކުވައިތަށްވެސް އަމާޒުކުރިއިރު ކުވައިތުގެ ހުރިހާ ހިސާބަކުން ބާރުގަދަ ގޮވުންތަކުގެ އަޑުފަށްގަނޑު އިވެމުންދިޔަ ކަމަށް ރިޕޯޓްތައް ބުނެއެވެ.
މީގެއިތުރުން، އުމާނަށްވެސް މިއަދު ފުރަތަމަ ފަހަރަށް ވަނީ އީރާނުގެ ޑްރޯން ހަމަލާތަކެއް އަމާޒުވެފައެވެ.
އީރާނު ހުއްޓުވަން ސަލާމަތީ މަޖިލީހަށް ގަރާރެއް ހުށަހެޅީ ގަލްފް ކޯޕަރޭޝަން ކައުންސިލް – ޖީސީސީންނެވެ. އދގެ މެމްބަރު 135 ގައުމަކުން މި ގަރާރު ކޯ ސްޕޮންސަރ ކުރިއެވެ. މިއީ، ސަލާމަތީ މަޖިލީހުން ފާސްކުރި ގަރާރެއް މިހާތަނަށް އެންމެ ގިނަ ގައުމުން ކޯ ސްޕޮންސަރކުރި ފަހަރެވެ.
އެ ގަރާރު ފާސްވީ ސަލާމަތީ މަޖިލީހުގައި ހިމެނޭ 15 މެމްބަރު ގައުމުގެ ތެރެއިން 13 މެމްބަރު ގައުމުގެ ވޯޓާ އެކުގައެވެ. ގަރާރު ވީޓޯ ނުކޮށް ރަޝިޔާ އަދި ޗައިނާ ވޯޓުގައި ބައިވެރިއެއް ނުވިއެވެ.
ސަލާމަތީ މަޖިލީހުގެ ގަރާރަށް އީރާނު ސަރުކާރުން އަދި ރަސްމީގޮތުން އެއްވެސް ޖަވާބެއް ނުދެއެވެ.
އެހެން ނަމަވެސް، އީރާނުން އދއަށް ކަނޑައަޅާފައި ހުންނަވާ އެމްބަސެޑަރ އާމިރު ސައީދު އިރަވާނީ ވިދާޅުވީ، ސަލާމަތީ މަޖިލީހުގެ ގަރާރަކީ އީރާނާ ދެކޮޅަށް ފާސްކުރި ވަރަށް ބޭއިންސާފު ގަރާރެއް ކަމަށެވެ.
އީރާނާ ދެކޮޅަށް ގަރާރު ފާސްކުރިއިރު، އީރާނާ ދެކޮޅަށް ހިންގަމުންގެންދާ އުދުވާނަށް އެއްވެސް ވަރަކަށް ރިއާޔަތް ނުކުރާ ކަމަށާއި، ހަގީގީ މައްސަލައަށް ރިއާޔަތް ނުކުރުމުން، ސަލާމަތީ މަޖިލީހުގެ ގަރާރަކީ އެއްވެސް އަދުލުވެރިކަމެއް އިންސާފެއްނެތް ގަރާރެއް ކަމަށް އޭނާ ވިދާޅުވިއެވެ.
އީރާނުގެ އެމްބަސެޑަރވަނީ، އެމެރިކާއާއި އިސްރާއީލުން އީރާނަށް ދެމުންގެންދާ ހަމަލާތަކުގައި މަރުވި މީހުންނާއި، ޒަޚަމްވި މީހުންގެ އަދަދުތަކާއި، އަދި ހަމަލާތަކުގައި އީރާނަށް ދެމުންގެންދާ ގެއްލުންތަކުގެ ތަފްސީލްތައް ސަލާމަތީ މަޖިލީހުގައި ހާމަކުރައްވާފައެވެ.
އީރާނުގެ ނުފޫޒުގަދަ އިސްލާމިކް ރިވޮލިއުޝަނަރި ގާޑުން މިރޭ ނެރުނު ބަޔާނެއްގައި ބުނެފައިވަނީ، ގަލްފްގެ ގައުމުތަކުގައި ހުރި އެމެރިކާއާއި އިސްރާއީލުގެ ތަންތަނަށް ދެމުންގެންދާ ރައްދު ހަމަލާތައް ހުއްޓާނުލާނޭ ކަމަށެވެ.
އީރާނުން ތަކުރާރުކޮށް ބުނަމުން ގެންދަނީ، އީރާނުން އަވަށްޓެރި އެއްވެސް ގައުމެއްގެ ތަނަކަށް ހަމަލާ ނުދޭ ކަމަށާއި، އީރާނުން ރައްދު ހަމަލާތައް ދެމުންގެންދަނީ އީރާނަށް ހަމަލާ ދިނުމަށް ބޭނުންކުރާ އެގައުމުތަކުގައި ހުރި އަސްކަރީ ބޭސްތަކަށާއި، ދުޝްމަނުން ރޭވުންތައް ރާވަން ތިބޭ ތަންތަނަށް އަމާޒުކޮށް ކަމަށެވެ.
ކިޔުންތެރިންގެ ހިޔާލު