ރައްޔިތުންނަށް ދުޅަހެޔޮ ސިއްހަތަކެއް ކަށަވަރުކުރުމަށްޓަކައި ރާއްޖޭގައި ޝީޝާ މަނާކުރަން މަޝްވަރާކުރަމުން އަންނަ ކަމަށް ހެލްތު މިނިސްޓަރު އަބްދުﷲ ނާޒިމް އިބްރާހީމް ވިދާޅުވެއްޖެއެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި ނާޒިމް ވިދާޅުވީ ޝީޝާ މަނާކުރުމުގެ އިތުރުން ހަކުރަށް ދޭ ސަބްސިޑީ ކަނޑާލައި ހަކުރުން ޓެކްސް ނެގުމާ ގުޅޭގޮތުން ވެސް މަޝްވަރާކުރަމުން އަންނަ ކަމަށެވެ.
ރާއްޖޭގައި ޝީޝާ މަނާކުރުމަށް ސިއްހީ ދާއިރާގެ މާހިރުން އަންނަނީ ސަރުކާރަށް ގޮވާލަމުންނެވެ. އަދި ހަކުރު ބައްޔަކީ ރާއްޖޭގައި ރާއްޖޭގައި އާންމުވަމުން އަންނަ ބައްޔަކަށްވާއިރު، އެ ބަލިން ރައްކާތެރިކުރުމަށް ޚާއްސަ ފިޔަވަޅުތަކެއް އަޅަންޖެހޭ ކަމަށް ސިއްހީ ދާއިރާގެ މާހިރުން ވިދާޅުވެއެވެ.
މިނިސްޓަރު ނާޒިމް ވިދާޅުވީ ސަރުކާރުން މިފަދަ ކަމެއްގައި ނިންމުމެއް ނިންމާނީ ކަމާބެހޭ އެންމެހައި ފަރާތްތަކާ މަޝްވަރާކުރުމަށްފަހު، އެކަމެއް ކުރުމަށް އެންމެ އެކަށީގެންވާ ވަގުތުގައި ކަމަށެވެ.
ސިއްހީ ދާއިރާގެ އެތައް ބަޔަކު އެދެމުން ދަނިކޮށް ސަރުކާރުން ވަނީ ރާއްޖޭގައި ވޭޕް ވެސް މަނާކޮށްފައެވެ. މިކަމާ ގުޅިގެން ސިއްހީ ދާއިރާގެ ގިނަ ބޭފުޅުން ވަނީ ރައީސް ޑރ. މުހައްމަދު މުއިއްޒަށް ތައުރީފް ކުރައްވާފަ އެވެ.
ދުންފަތާ ދެކޮޅަށް ވެސް ޖެހިލުންކުޑަކަމާއެކު އެންމެ މުހިންމު ފިޔަވަޅު އެޅުއްވީ ރައީސް ޑރ. މުއިއްޒެވެ. އެ ފިޔަވަޅަކީ 2000 ވަނަ އަހަރުން ފެށިގެން ރާއްޖޭގައި އުފަންވެފައިވާ އެންމެން ދުންފަތުގެ އިސްތިއުމާލުކުރުން ގާނޫނީގޮތުން މަނާކުރުމެވެ.
ކިޔުންތެރިންގެ ހިޔާލު