އަލިފާނުގެ ހާދިސާތަކުން ރައްކާތެރިވުމަށް ސްޓެލްކޯގެ މުވައްޒަފުންނަށް ކުރިއަށްގެންދިޔަ ފަޔާ ވޯޑަން – ޓްރެއިން ދަ ޓްރެއިނަރު ޕްރޮގްރާމްގެ ބައިވެރިންނަށް ސެޓްފިކެޓް ދީފިއެވެ.
މި ޕްރޮގްރާމް ފުރިހަމަކޮށް ސްޓެލްކޯގެ 30 މުވައްޒަފުން މިއަދު ވަނީ ސެޓްފިކެޓް ހާސިލްކޮށްފައެވެ. ބައިވެރިންނަށް ސެޓްފިކެޓް ދެއްވީ ނޭޝަނަލް ޑިޒާސްޓަރު މެނޭޖްމަންޓް އޮތޯރިޓީ (އެންޑީއެމްއޭ)ގެ ސީއީއޯ ހިސާން ހަސަނާއި ސްޓެލްކޯ ހިންގެވުމާއި ޙަވާލުވެވަޑައިގެން ހުންނެވި ޑެޕިއުޓީ މެނޭޖިންގ ޑިރެކްޓަރު ޑރ. އަލީ އަޒްވަރެވެ.
ސްޓެލްކޯއިން ވިދާޅުވީ، ފަޔާ ވޯޑަން “ޓްރެއިން ދަ ޓްރޭނަރު” މި ޕްރޮގްރާމަކީ، މަސައްކަތުގެ މާހައުލުގައި އަލިފާނުގެ ހާދިސާތަކުން ރައްކާތެރިވުމުގެ މިންގަނޑުތައް ހަރުދަނާކުރުމަށާއި، ކުއްލި ހާލަތްތަކަށް ތައްޔާރުވެފައިވާ މިންވަރު އިތުރުކުރުމަށްޓަކައި، އެންޑީއެމްއޭ އާ ގުޅިގެން ކުރިއަށްގެންގޮސްފައިވާ ތަމްރީނު ޕްރޮގްރާމެއް ކަމަށެވެ.
މި ޕްރޮގްރާމަކީ، ކުއްލި ހާލަތްތަކުގައި ފަޔާ ވޯޑަނުންގެ މަސްއޫލިއްޔަތު އަދާކުރުމަށް އެހެން މުވައްޒަފުން ތަމްރީނުކުރުމަށް ބޭނުންވާ އިލްމާއި، އަމަލީ ހުނަރާއި، އުނގަންނައިދިނުމުގެ ފަންނީ ގާބިލުކަން މުވައްޒަފުންގެ ކިބައިގައި އަށަގަންނުވައި، ސްޓެލްކޯގައި ތަމްރީނު ދިނުމުގެ ގާބިލުކަން އިތުރުކުރުމަށް ހިންގާފައިވާ ޕްރޮގްރާމެއް ކަމަށްވެސް ވިދާޅުވިއެވެ.
މި ޕްރޮގްރާމްގައި ކިޔަވައިދެއްވާފައިވަނީ އެންޑީއެމްއޭ އާއި މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) ގެ ތަޖުރިބާކާރުންނެވެ.
އެ ރަސްމިއްޔާތުގައި ވާހަކަފުޅު ދައްކަވަމުން ޑރ. އަލީ އަޒްވަރު ވިދާޅުވީ މި މަސައްކަތަކީ އަޅުގަނޑުމެން 2024 ވަނަ އަހަރު އެންޑީއެމްއާ އެއްކޮށް ވެވުނު އެމްއޯޔޫއެއްގެ ދަށުން ކުރަމުން އައި ހަރަކާތްތަކުގެ ތެރެއިން އެއްބައި ކަމަށެވެ.
“އޭގެތެރޭ ހިމެނޭ އެއްކަންތައް އެމަޖެންސީ ރެސްޕޮންސް ޕްލޭނެއް ތައްޔާރުކުރުމުގެ ކަންތައް. އޭގަ ހިމެނޭ އެއް ކަމަކީ އިވެކުއޭޝަން ޕްލޭނެއްގެ މަސައްކަތް. އެކަމަށްޓަކާ އަޅުގަނޑުމެން ތައްޔާރުކުރަންޖެހޭ ފަޔަރ ވޯޑަނުން ތައްޔާރުކުރުން މި އެކްސަސައިޒްގަ މި ގެންދެވުނީ. އެކަމަށް އިތުރު ބޭފުޅުން ތައްޔާރުކުރުމުގެ ގޮތުން ފުރަތަމަ ޓްރެއިން ދަ ޓްރެއިނަރސް މި ހިންގުނީ. ކުންފުނީގެ ލެވެލްގަ މި ބޭފުޅުންގެ ބޭނުން ހިފައިގެން އަދި އިތުރު މުވައްޒަފުންނަށް އެ ބޭފުޅުނުންނަށް އެ ލިބިލެއްވި ތަމްރީނުގެ އަލީގަ މި ޙަރަކާތް އިތުރަށް އަދި ކުރިއަށްއޮތް ތާނގަ އެބޭފުޅުން ކުރިއަށް ގެންގޮސްދެއްވާނެ،”.
ހިސާން ވިދާޅުވީ ކުންފުންޏެއް ނުވަތަ މުއްސަސާއެއް ނުވަތަ އޮފީހެއް، ވިލުންތެރި އޮފީހަކަށް ނުވަތަ ކުންފުންޏަކަށް ވަނީ ބޮޑެތި ކަންތައްތައް ދިމާވާ ވަގުތުގަ އެ ކުންފުނިތަކުން ނުވަތަ އޮފީސްތަކުން ރައްޔިތުންނަށް ފޯރުކޮށްދެމުންދާ ހިދުމަތްތައް މެދުނުކެނޑި އެ ޙާލަތުގަވެސް ފޯރުކޮށްދެމުން ގެންދާގެންދިއުމަށް ބުރުލެއްނާރާ އަސްލުގަ ކުރިއަށް ދިއުން ކަމަށެވެ.
ކިޔުންތެރިންގެ ހިޔާލު