ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އިން ހުޅުމާލޭގެ ފުރަތަމަ ފިަތަމަ ފިޔަވަހީގައި ތެޔޮ ރައްކާކުރާ ޓޭންކުތަކެއް ޤާއިމްކުރުމުގެ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އާ ހަވާލުކޮށްފިއެވެ. މި މަޝްރޫޢުގެ މައިގަނޑު މަޤްޞަދަކީ ކަރަންޓުގެ ޑިމާންޑް އެންމެ ބޮޑުވާ ވަގުތުތަކުގައި ޚިދުމަތް މެދުނުކެނޑި ފޯރުކޮށްދިނުމަށް މަގުފަހިކުރުމެވެ.

މާލެ ސަރަޙައްދުގެ އާބާދީ އިތުރުވަމުން އަންނަ ނިސްބަތަށް ބަލައި، ދެމެހެއްޓެނިވި ގޮތެއްގައި ކަރަންޓުގެ ޚިދުމަތް ފޯރުކޮށްދިނުމަށްޓަކައި ސްޓެލްކޯއިން ވަނީ ހުޅުމާލޭގައި ވަގުތީ އިންޖީނުގެއެއް ޤާއިމްކޮށްފައެވެ. މި މަޝްރޫޢުގެ ދަށުން 13 ޖަނަރޭޓަރު ބަހައްޓައި، ގްރިޑަށް ޖުމްލަ 17 މެގަވޮޓްގެ ކަރަންޓު ކެޕޭސިޓީ އިތުރުކުރެވޭނެއެވެ.

މި އެއްބަސްވުމުގައި ސްޓެލްކޯގެ ފަރާތުން ސޮއިކުރެއްވީ މެނޭޖިންގ ޑިރެކްޓަރ ޙުސައިން ފަހުމީ އެވެ. އަދި އެމްޓީސީސީގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރ، ރިޓަޔަރޑް ޑެޕިއުޓީ ކޮމިޝަނަރ އޮފް ޕޮލިސް އަޙްމަދު ސަޢުދީ އެވެ.

މިހާރު ކުރިމަތިވެފައިވާ ހޫނު މޫސުމާ ގުޅިގެން ކަރަންޓުގެ ބޭނުންކުރުން ދުވަހެއް ދުވަހަކަށް އިތުރުވަމުންދާކަން ފާހަގަކުރެވެއެވެ. މިވަގުތު މާލެ ސަރަޙައްދުގައި ޕީކް ގަޑީގައި ބޭނުންކުރާ ކަރަންޓު 98 މެގަވޮޓްއަށް އަރާފައިވާއިރު، ކުރިއަށް އޮތް ދުވަސްތަކުގައި މި އަދަދު 120 މެގަވޮޓްއަށް އަރާނެކަމަށް ސްޓެލްކޯއިން ލަފާކުރެއެވެ. ނަމަވެސް، އަލަށް ބޭނުންކުރަން ފަށާފައިވާ 17 މެގަވޮޓްގެ ވަގުތީ އިންޖީނުގެއާއެކު، އިތުރުވާ ކެޕޭސިޓީއަށް ދަތިކަމެއްނެތި ޚިދުމަތް ދެވޭނެކަމުގެ ޔަޤީންކަން ސްޓެލްކޯއިން ދެއްވާފައިވެއެވެ.

މާލެ ސަރަޙައްދުގައި މިހާރު ކަރަންޓުގެ ޚިދުމަތް ދެމުން ގެންދަނީ މާލެއާއި ހުޅުމާލެ ހިމެނޭހެން ގުޅިފައިވާ ވިއުގައަކުންނެވެ. މި އައު މަޝްރޫޢުގެ ސަބަބުން ކަރަންޓުގެ ޚިދުމަތް އިތުރަށް ހަރުދަނާވެ، ރައްޔިތުންނަށް ލިބޭ ޚިދުމަތުގެ ފެންވަރު މަތިވެގެންދާނެކަމަށް އުންމީދުކުރެވެއެވެ.