މި ދުނިޔެމަތީގައި އުފާވެރިކަމާއި ބާއްޖަވެރިކަން ލިބޭނީ އެއް މުއުމިނާ އަނެއް މުއުމިނާއާއި ދޭތެރޭގައި އޮންނަ ގުޅުން ރަނގަޅުވުމުންކަމަށް ކުރީގެ ރައީސް އަލްއުސްތާޛު މައުމޫން ޢަބްދުލްޤައްޔޫމް ވިދާޅުވެއްޖެއެވެ. އެމަނިކުފާނު މިހެން ވިދާޅުވީ، މައުމޫން ފައުންޑޭޝަނުން ބޭއްވި 2 ވަނަ އިޙްޔާ ޖަލްސާގައި ވާހަކަދައްކަވަމުންނެވެ.
“އެއް މުއުމިނާ އަނެއް މުއުމިނާއާއި ދޭތެރޭގައި އޮންނަ ގުޅުން ވާންޖެހޭނީ އަޚުންގެ މެދުގައި އެއްބަނޑު އެއްބަފާ ބައެއްގެ މެދުގައި އޮންނަ ފަދަ ރީތި ލޮބުވެތި ގުޅުމަކަށް. އެކަކު އަނެކަކަށް ކަމޭހިތައި، އެކެއްގެ ހައްޤުތައް ރައްކާތެރިކޮށް އެކަކު އަނެކަކަށް އެހީތެރިވުމުގެ މައްޗަށް މި ގުޅުން އޮންނަންޖެހޭނީ ބިނާވެފައި. އެގޮތުގެ މަތިން އަޅުގަނޑުމެން ދިރިއުޅެމުން ގެންދާކަމަށް ވަނީނަމަ މި ދުނިޔޭގެ ހަޔާތުގައި އަޅުގަނޑުމެންނަށްވެސް އުފާވެރިކަމާއި، ބާއްޖަވެރިކަމާއި ހަމަޖެހުން ލިބޭނެ.” ރައީސް މައުމޫން
މި ފޯރަމްގައި ރައީސް މައުމޫން ވާހަކަދައްކަވާފައިވަނީ “މުއުމިނުން ވާކަންކަށަވަރީ، އަޚުންތަކެއް ކަމުގައި” މި މައުޟޫއަށެވެ. މި މައުޟޫއަށް ވާހަކަދައްކަވަމުން ރައީސް މައުމޫން ވިދާޅުވީ، އެއް މުއުމިނަކު އަނެއް މުއުމިނަކާއި ދެމެދު އޮންނަ ގުޅުން ވާންވާނީ އަޚުންތަކެއްގެ ގޮތުގައި އޮންނަ ރީތި ގުޅުމަކަށްކަމަށެވެ. ދުނިޔެމަތީގައި އުފާވެރިކަމާއި ބާއްޖަވެރިކަން ލިބޭނީ އޭރުންކަމަށް ވިދާޅުވިއެވެ.
2 އަޚުންގެ ދެމެދުގައި ހަމަނުޖެހުމެއް ވާނަމަ އެކަންތައްތައް ހައްލުކުރަންޖެހޭކަން ފާހަގަކުރައްވާ، ރައީސް މައުމޫން ވިދާޅުވީ، އެދެމީހުން ވާހަކަދައްކާ އެކަންކަން ހައްލު ކުރަން މާތް ﷲ ޤުރްއާނުގައި ބަޔާންކުރައްވާފައިވާކަމަށެވެ.
ކިޔުންތެރިންގެ ހިޔާލު