ބ. ފުޅަދޫގެ އާންމު ސަރަހައްދުތަކުގައި ފަތުރުވެރިން ބިކިނީ ފަދަ ނިވާކަން ކުޑަ ހެދުން އަޅައިގެން އުޅޭ ނަމަ، އެ ފަތުރުވެރިން ރަށަށް ގެނެސް ހިދުމަތްދޭ ގެސްޓްހައުސްތައް 750 ރުފިޔާ އިން ޖޫރިމަނާކުރުމަށް އެ ރަށު ކައުންސިލުން ނިންމައިފިއެވެ.

ފުޅަދޫ ކައުންސިލުން ކުރި އިއުލާނެއްގައި ބުނީ އެ ރަށުގެ އާންމު ތަންތަނުގައި ފަތުރުވެރިން މުޖުތަމައުގެ އާންމު މިންގަނޑުތަކާ ހިލާފަށް ހެދުން އަޅައިގެން އުޅޭ ކަމުގެ ޝަކުވާ ރަށުގެ ރައްޔިތުންގެ ފަރާތުން ކައުންސިލަށް ލިބެމުންދާ ކަމަށެވެ. އެހެންވެ އެ މައްސަލައާ ގުޅިގެން ކައުންސިލްގެ ރަސްމީ ޖަލްސާއަކުން މިހާރު ވަނީ ގޮތެއް ނިންމާފައި ކަމަށް ކައުންސިލުން ބުންޏެވެ.

އެގޮތުން، ކުރިއަށްއޮތް ތަނުގައި އާންމު މިންގަނޑުން ބޭރުން ފަތުރުވެރިއަކު ހެދުން އަޅައިގެން އުޅޭކަން ފާހަގަކުރެވިއްޖެ ނަމަ، އެ ފަތުރުވެރިޔަކު ނިސްބަތްވާ ގެސްޓްހައުސްއެއް ބަލައި، އެ ތަނެއް 750 ރުފިޔާ އިން ޖޫރިމަނާ ކުރާނެކަމަށް ކައުންސިލުން ބުންޏެވެ.

އެކަން އަންގައި ދިވެހި ބަހުންނާއި އިނގިރޭސި ބަހުން ވެސް ކައުންސިލުން ވަނީ އިއުލާނު ނެރެފައެވެ.