އޮސްޓްރޭލިއާއިން ރާއްޖެއަށް ޒިޔާރަތްކުރާ ފަތުރުވެރިންގެ ޢަދަދަށް ފާހަގަކޮށްލެވޭ ބޮޑު ކުރިއެރުމެއް އައިސް، ރާއްޖެއަށް އެންމެ ގިނައިން ފަތުރުވެރިން އަންނަ ޤައުމުތަކުގެ ލިސްޓުގެ 7 ވަނައަށް އެ ޤައުމު ކުރިއަށް ޖެހިލައިފިއެވެ. ފާއިތުވި އަހަރު ނިމުނުއިރު އެ ޤައުމު އޮތީ މި ލިސްޓުގެ 11 ވަނައިގައެވެ.
ފަތުރުވެރިކަމާ ބެހޭ ވުޒާރާގެ އެންމެ ފަހުގެ ތަފާސްހިސާބުތައް ދައްކާގޮތުން، މިއަހަރުގެ މިހާތަނަށް އޮސްޓްރޭލިއާއިން ރާއްޖެއަށް 39،487 ފަތުރުވެރިން ވަނީ ޒިޔާރަތްކޮށްފައެވެ. މިއީ މިދިޔަ އަހަރުގެ މި މުއްދަތުގައި އެ ޤައުމުން ޒިޔާރަތްކުރި 32،843 ފަތުރުވެރިންނާ އަޅާބަލާއިރު %20.2 ގެ ބޮޑު ކުރިއެރުމެކެވެ. މިއާއެކު ރާއްޖެއަށް އަންނަ މުޅި ފަތުރުވެރިންގެ %2.4 ހިއްސާކުރަނީ އޮސްޓްރޭލިއާ މާކެޓުންނެވެ.
މިއަހަރުގެ ފުރަތަމަ ހަ މަސްދުވަހުގެ ތެރޭގައި އެ ޤައުމުން 17،737 ފަތުރުވެރިން ޒިޔާރަތްކުރި ނަމަވެސް، ފަހަކަށް އައިސް މި ޢަދަދު ވަނީ ދެގުނައަށްވުރެ ބޮޑަށް އިތުރުވެފައެވެ. މި ކުރިއެރުމުގެ މައިގަނޑު އެއް ސަބަބަކީ، ޤައުމީ އެއާލައިން “މޯލްޑިވިއަން” އިން މިއަހަރުގެ މެއި މަހު އޭ330 މަރުކާގެ ބޯޓުގައި އޮސްޓްރޭލިއާގެ މެލްބަންއަށް ސީދާ ދަތުރުތައް ފެށުމެވެ. މި ދަތުރުތަކަށް އޮތް ބޮޑު ތަރުޙީބާއެކު، އަންނަ އަހަރުން ފެށިގެން ހަފުތާއަކު އެއް ދަތުރު ޝެޑިއުލްކޮށް ބޭއްވުމަށް މިހާރު ވަނީ ނިންމާފައެވެ.
ރާއްޖޭގެ ފަތުރުވެރިކަމުގެ އެންމެ ކުރީގައި އަދިވެސް އޮތީ 300،000 އަށްވުރެ ގިނަ ފަތުރުވެރިންނާއެކު ޗައިނާއެވެ. ދެވަނައިގައި 200،000 އަށްވުރެ ގިނަ ފަތުރުވެރިންނާއެކު ރަޝިއާ އޮތްއިރު، އިނގިރޭސިވިލާތާއި، ޖަރުމަނުވިލާތް އަދި އިޓަލީވިލާތުން ކޮންމެ ޤައުމަކުން 100،000 އަށްވުރެ ގިނަ ފަތުރުވެރިން ވަނީ ޒިޔާރަތްކޮށްފައެވެ. އަދި އަވައްޓެރި އިންޑިއާއިން 95،000 އަށްވުރެ ގިނަ ފަތުރުވެރިން ވަނީ ޒިޔާރަތްކޮށްފައެވެ.
ކިޔުންތެރިންގެ ހިޔާލު