އެކީގައި މަސައްކަތްކުރާނެ ކައުންސިލަރުންތަކެއް، ޑަބްލިޔުޑީސީއެއް، މޭޔަރެއް ހުރުމަކީ ކޮންމެހެން ކުރަންޖެހޭނެ ކަމެއް ކަމަށާއި ސަރުކާރާ ދެކޮޅަށް މަސައްކަތްކުރާ ކައުންސިލަރުން ހޮވައިފި ނަމަ، ހުރިހާ ރައްޔިތުންނަށް އެކަމުގެ ގެއްލުންވާނެ ކަމަށް ރައީސް ޑރ. މުހައްމަދު މުއިއްޒުގެ އަނބިކަނބަލުން، މެޑަމް ސާޖިދާ މުހައްމަދު ވިދާޅުވެއްޖެއެވެ.
ކުރިއަށްއޮތް ލޯކަލް ކައުންސިލު އިންތިހާބަށް މާފަންނު ދެކުނު ދާއިރާގެ ޕީއެންސީގެ ޖަހަގަ ހުޅުވުމަށް މިރޭ ބޭއްވި ޖަލްސާގައި ވާހަކަދައްކަވަމުން މެޑަމް ސާޖިދާ ވިދާޅުވީ ކައުންސިލުތަކަކީ ސަރުކާރުގެ ސިޔާސަތުތައް ތަންފީޒުކުރުމުގައި ރައްޔިތުންނާ އެންމެ ގާތުން މަސައްކަތްކުރާނެ ފަރާތްތައް ކަމަށާއި އެހެންކަމުން ރައްޔިތުންގެ ހުރި ހުރިހާ ކަންކަމެއް ސީދާ ސަރުކާރަށް ގެނެސްދެވޭނެ ބަޔަކު ތިބުމަކީ ރައްޔިތުންނަށް އޭގެ ލަބަޔާއި މަންފާކުރާނެ ކަމެއް ކަމަށެވެ.
“އިޖުތިމާއީ އެތައް ގޮންޖެހުންތަކެއް އޮތް ގައުމެއްގައި ވަރަށް އުނދަގޫ ނިންމުންތަކެއް ނިންމަވަމުން ރައީސުލްޖުމްހޫރިއްޔާ ވަޑައިގަންނަވާ އިރު، އެ ސަރުކާރަކަށް އަޅުގަނޑުމެން އެއްބާރުލުންދޭނެ ބަޔަކު ނުހޮވައިފި ނަމަ، އޭގެ ގެއްލުން އަޅުގަނޑުމެން ހުރިހާ ރައްޔިތުންނަށް ކުރާނެ. އެއީ ހަމަ ޔަގީން ވެސް ކަމެއް،” މެޑަމް ސާޖިދާ
މެޑަމް ސާޖިދާ ވިދާޅުވީ ރެޔާއި ދުވާލު މަސައްކަތްކުރައްވަމުންދާ ވެރިޔަކާ އެކީގައި މަސައްކަތްކުރާނެ ކައުންސިލަރުންތަކެއް، ޑަބްލިޔުޑީސީއެއް، މޭޔަރެއް ހުރުމަކީ ކޮންމެހެން ކުރަންޖެހޭނެ ކަމެއް ކަމަށެވެ. އަދި ސަރުކާރާ ދެކޮޅަށް މަސައްކަތްކުރުމުގެ ވިސްނުމުގައި އަންނަ ނަމަ، ރައްޔިތުންނަށް ވާނެ އެއްވެސް ފައިދާއެއް ނޯންނާނެ ކަމަށް ވިދާޅުވިއެވެ.
“އެހެންވީމާ އަޅުގަނޑު މި ދަންނަވަނީ މިއަދު އަޅުގަނޑުމެން މި މަސައްކަތްކުރަން ޖެހެނީ ސަރުކާރު މިދަނީ ރަނގަޅު ސިޔާސަތަކަށްކަން އަޅުގަނޑުމެން ކޮންމެ މީހަކަށް އެބަ އެނގޭ. ސިޔާސީގޮތުން ބެލި ކަމުގައިވިޔަސް، މިއަދު އަޅުގަނޑުމެން ބޭނުންވަނީ ރަނގަޅު، ކިޔަވައިގެން ތިބި ރާއްޖޭގައި ރަނގަޅަށް މަސައްކަތްކުރެވޭނެ ސިޔާސީ ބައެއް ނުކުންނަން،” އެކަމަނާ ވިދާޅުވިއެވެ.
ކިޔުންތެރިންގެ ހިޔާލު