ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، އިނގިރޭސިވިލާތަށް ކުރެއްވި ދަތުރުފުޅު ނިންމަވާލައްވައިފިއެވެ.
މި ދަތުރުފުޅަކީ، ދަ ސަސްޓެއިނަބަލް މާކެޓްސް އިންޝިއޭޓިވް
އިން އިންތިޒާމުކުރި “ޕްރައިވެޓް ކެޕިޓަލް މޮބިލައިޒޭޝަން” އާއި ގުޅޭ މަތީ ފެންވަރުގެ ބްރީފިންގ ސެޝަންގައި ބައިވެރިވެވަޑައިގަތުމަށް ކުރެއްވި ދަތުރުފުޅެކެވެ.
މި ބްރީފިންގ ސެޝަން ބާއްވާފައިވަނީ އިނގިރޭސިވިލާތުގެ ރަސްގެފާނު، ހިޒް މެޖެސްޓީ ކިންގް ޗާލްސް ތިންވަނަގެ ހޯސްޓްކުރެއްވުމުގެ ދަށުންނެވެ. މި ބައްދަލުވުމުގައި، ގިނަ ފަރާތްތަކެއް ބައިވެރިވާ ތަރައްޤީގެ ބޭންކުތަކުގެ (MDBs) އިސްވެރިންނާއި، ޕްރައިވެޓް ފައިނޭންސްގެ ދާއިރާގެ ލީޑަރުން ބައިވެރިވެވަޑައިގެންނެވިއެވެ.
މި ބްރީފިންގ ސެޝަންގެ މައިގަނޑު މަޤްޞަދަކީ، ދުނިޔޭގެ ދެމެހެއްޓެނިވި ލަނޑުދަނޑިތައް ހާސިލުކުރުމަށްޓަކައި، ޕްރައިވެޓް ކެޕިޓަލް ހޯދުމުގެ މަސައްކަތްތައް އަވަސްކުރުމަށް ބާރުއެޅުމެވެ. މިގޮތުން، ދުނިޔޭގެ ދެމެހެއްޓެނިވި ތަރައްޤީއަށް އެހީތެރިވެދޭނެ ހައްލުތަކަށް ޕްރައިވެޓް ފައިނޭންސްގެ ބައިވެރިވުން އިތުރުކުރުމަށް މަޝްވަރާކުރެވުނެވެ.
ރައީސް މުޢިއްޒު މި ބްރީފިންގގައި ބައިވެރިވެވަޑައިގެންނެވުމަކީ، ދުނިޔޭގެ މުހިންމު މައްސަލަތަކުގައި ދިވެހިރާއްޖެއިން އަދާކުރާ ދައުރު ފުޅާކުރުމަށް ކުރެވުނު މަސައްކަތެކެވެ. އަދި، ރާއްޖޭގެ ތަރައްޤީގެ މަޝްރޫޢުތަކަށް ބޭރުގެ އިންވެސްޓްމަންޓް ގެނައުމަށް މަގުފަހިކޮށްދިނުމަށް އެޅުނު މުހިންމު ފިޔަވަޅެއް ކަމަށް ސަރުކާރުން ބުނެއެވެ.
ކިޔުންތެރިންގެ ހިޔާލު