ރީނދޫ ސަމާލާއި އޮރެންޖެ ސަމާލު ނެރެފައިވަނިކޮށް ދަތުރު ނުކުރުމަށް އެމްއެންޑީއެފުން އިލްތިމާސްކޮށްފިއެވެ.
އެމްއެންޑީއެފުން ބުނީ ކުރިއަށް އޮތް ދުވަސްތަކުގައި މޫސުން ގޯސް ވާނެކަމަށް ގައުމީ މޫސުމާބެހޭ އިދާރާ، މެޓުން ލަފާކޮށްފައިވާ ކަމަށެވެ. މުޅިރާއްޖެއަށް ވައި ބާރުވެ ކަނޑުތައް ގަދަވާނެކަމަށްވެސް މެޓުން ލަފާކޮށްފައިވާ ކަމަށެވެ.
އެހެންވެ ކަނޑުމަގުން ކޮންމެހެން ކުރާން ޖެހޭ ދަތުރުތައް ފިޔަވައި އެހެން ދަތުރުތައް ނުކުރުމަށް އިލްތިމާސްކުރާކަމަށް އެމްއެންޑީއެފުން ބުންޏެވެ.
“އަދި މޫސުމާބެހޭ ގައުމީ އިދާރާއިން ރީނދޫ ނުވަތަ އޮރެންޖު ސަމާލު ނެރެފައިވަނިކޮށް ދަތުރު ނުކުރެއްވުމަށްވެސް އިލްތިމާސްކުރަމެވެ.” އެމްއެންޑީއެފު
ޑައިވިން އަދި ވޯޓާ ސްޕޯޓްސްގެ ހިދުމަތް ދޭ ފަރާތްތަކުންވެސް މޫސުމަށް ހާއްސަ ސަމާލުކަމެއް ދިނުމަށް އިލްތިމާސްކުރާކަމަށް އެމްއެންޑީއެފުން ބުންޏެވެ.
އެމްއެންޑީއެފުން ބުނީ ދަތުރުކުރާ އުޅަނދުތަކުން ލައިފް ޖެކެޓާއި، މުވާސަލާތީ ނިޒާމު ހުރީ ރަނގަޅަށްތޯ ޗެކް ކުރަން ޖެހޭނެ ކަމަށެވެ.
އުޅަނދަށް މުދާ އެރުވުމުގައި އެކަށީގެންވާ ވަރަށްވުރެ އިތުރަށް މުދާ އަރުވައި އުޅަނދު ބަރު ނުކުރުމަށްވެސް އެމްއެންޑީއެފުން އިލްތިމާސްކޮށްފައިވެއެވެ. ދިޔަހިއްކާ ޕަންޕުފަދަ ތަކެތި ރަނގަޅަށް މަސައްކަތް ކުރޭތޯ ކަށަވަރުކުރަން އެމްއެންޑީއެފުން އިލްތިމާސްކުރިއެވެ.
ކިޔުންތެރިންގެ ހިޔާލު