އެމެރިކާގެ ހަނގުރާމަމަތީ އެންމެ ބިޔަ މަނަވަރު ޔޫއެސްއެސް ޖެރަލްޑް އާރް ފޯރޑް ހިމެނޭ ހަނގުރާމައިގެ އެންމެ ވަރުގަދަ އަދި އެންމެ ބިޔަ ލަޝްކަރު ވެނެޒުއެލާ ކައިރިއަށް ދިއުމާއެކު މަސްރަހް އިތުރަށް ނުތަނަވަސް ވެއްޖެއެވެ.

މި ލަޝްކަރު ވެނެޒުއެލާ ކައިރިއަށް މި ޖަމާވީ އެމެރިކާގެ ރައީސް ޑޮނަލްޑް ޓްރަމްޕް އަމުރު ކޮށްގެންނެވެ.

ޖެރަލްޑް އާރް ފޯރޑް ހިމެނޭ ލަޝްކަރަކީ އެއަރ ވިންގަކާއެކު އޮންނަ އެމެރިކާގެ ހަނގުރާމައިގެ އެންމެ ބިޔަ ލަޝްކަރެވެ.

އިޝްތިހާރު އިޝްތިހާރު

މިއީ، އިރާގު ހަނގުރާމައަށްފަހު އެމެރިކާ ސިފައިންގެ މި ލަޝްކަރު ޖަމާކުރެވުނު ފުރަތަމަ ފަހަރެވެ.

ޚަބަރުތައް ބުނާގޮތުގައި، ޖެރަލްޑް އާރް ފޯރޑް ހިމެނޭ  ގާފިލާ ވެނެޒުއެލާ ގާތަށް ދިއުމާއެކު، ވެނެޒުއެލާގެ އަސްކަރިއްޔާވެސް މިހާރުވަނީ ތައްޔާރީ ހާލަތަށް އައިސްފައެވެ.

އެއްގަމާއި، ވަޔާއި އަދި ކަނޑުގެ ސިފައިންގެ ދެލައްކަ ސިފައިންގެ ފައުޖެއް ތައްޔާރީ ހާލަށް ގެނައިއިރު، ރިޒާވް ފައުޖުވެސް އޮތީ ތައްޔާރުކޮށްފައެވެ.

އަދި ވެނެޒުއެލާގެ ޑިފެންސް މިނިސްޓަރު ވްލަޑިމީރް ޕެޑްރިނޯ ލޮޕޭޒްވަނީ، މުޅި ގައުމުވެސް ކުއްލި ހާލަތަށް ގެނެސްފައެވެ.

އެމެރިކާގެ ރައީސް ޓްރަމްޕް ދޭންފެށި އިންޒާރުތަކާއެކު ވެނެޒުއެލާއިން ދިޔައީ ހަނގުރާމައަށް ތައްޔާރު ވަމުންނެވެ.

އެގޮތުން، މިސައިލުން ދިފާއުވާ ސިސްޓަމްތައް، އެމެރިކާ ސިފައިން ޖަމާވަމުންދާ ފަޅީގައި  ގާއިމްކޮށް އަދި ހަނގުރާމަމަތީ ޖެޓުތައްވެސް ރުކުރުވާލާފައި ވެއެވެ.

އެމެރިކާގެ ރައީސް ޓްރަމްޕް ވެނެޒުއެލާއަށް ހަމަލާދޭން އަމުރުކުރީ، އެމެރިކާއަށް މަސްތުވާތަކެތި އެތެރެކުރަނީ ވެނެޒުއެލާއިން ކަމަށް ބުނެއެވެ. ނަމަވެސް، މި ވާހަކަ އެންމެން ދޮގު ކުރެއެވެ.

ތަޖުރިބާކާރުން ބުނަނީ، ދެކުނު އެމެރިކާގެ ގައުމުތަކުގެ ތެރެއިންވެސް ވެނެޒުއެލާއަކީ މަސްތުވާތަކެތީގެ މައްސަލަ އެންމެ މަދު އެއް ގައުމު ކަމަށެވެ. އެގައުމުން އެމެރިކާއަށް މަސްތުވާތަކެތި އެތެރެކުރާ ކަމަށް އެމެރިކާގެ ރައީސް ދައްކާ ވާހަކަތައް ގިނަ ބަޔަކު ގަބޫލެއް ނުކުރެއެވެ.

އެމެރިކާއިން ތުހުމަތުކުރާ މަސްތުވާތަކެތީގެ ބާވަތްތައް ގިނައިން އުފައްދާ ގައުމުތަކުގެ ތެރޭގައިވެސް ވެނެޒުއެލާ ނުހިމެނެއެވެ. އަދި އެމެރިކާއިން ލިސްޓްކުރި ބައެއް ބާވަތްތައް ވެނެޒުއެލާގައިވެސް ނުހުރެއެވެ.

އެމެރިކާގެ މިހާރުގެ ބޭނުމަކީ މަސްތުވާތަކެތި ނޫން ކަމާއި، ޓްރަމްޕްގެ ބޭނުމަކީ ވެނެޒުއެލާގެ ވެރިކަމުން ނިކޮލާސް މަދޫރޯ ދުރުކުރުން ކަމަށް މިހާރުވަނީ ޔަގީން ވެފައެވެ. އެއީ ވެނެޒުއެލާގެ ތެލުގެ ބޭނުމުގައި ކަމަށްވެސް ގިނަ ބަޔަކު ގެންދަނީ ބުނަމުންނެވެ. ވެނެޒުއެލާއަކީ ދުނިޔޭގެ ތެލުގެ އެންމެބޮޑު ރިޒާވް ހުރި ގައުމެވެ.

ވައިގެމަގުން ހަމަލާ ދިނުމުގެ އިތުރުން، އެއްގަމުމަގުންވެސް އެމެރިކާ ސިފައިން ވެނެޒުއެލާއަށް އަރާން ވަނީ ތައްޔާރުވެފައެވެ.

މަސްރަހްގެ ކަންކަން ބަލަމުންދާ ފަރާތްތަކުން ބުނަނީ، އިސާހިތަކު ހަނގުރާމަ ފެށިދާނެ ކަމަށެވެ.