މި ސަރުކާރުގައި އައްޑޫގެ ހުޅުދުއާއި މީދޫ ވާނީ، އިގުތިސާދީ ގޮތުންނާއި ޓެކްނޮލޮޖީގެ ގޮތުން އެންމެ ކުރިއަރައިފައިވާ ސިޓީތަކުގެ ތެރޭގައި ހިމެނޭ، ދުބާއީއާއި އަބޫދާބީއަށް ކަމަށް ހުޅުދޫ ދާއިރާގެ މަޖިލިސް މެންބަރު މުހައްމަދު ޝާހިދު މިއަދު ވިދާޅުވެއްޖެއެވެ.
ރައީސް ޑރ. މުހައްމަދު މުއިއްޒު ހުޅުދޫ ރައްޔިތުންނާ ބައްދަލުކުރެއްވުމަށް މިއަދު ބޭއްވި ޖަލްސާގައި ވާހަކަދައްކަވަމުން ޝާހިދު ވިދާޅުވީ އައްޑޫގެ އެހެން ރަށްތަކާ އެކަހެރިކޮށް އޮންނަ ހުޅުދުއާއި މީދޫއަކީ ވަރަށް ނިކަމެތި ދެ ރަށް ކަމަށް ބައެއް މީހުންނަށް ހީވެދާނެ ކަމަށެވެ. ނަމަވެސް އެއީ ރާއްޖޭގެ ފަސްވަނައަށް އެންމެ ބިން ބޮޑު ދެ ރަށް ކަމަށާއި ދެ ރަށުގައި އޮންނަނީ ހަވަނައަށް އެންމެ ބޮޑު އާބާދީ ކަމަށް އޭނާ ވިދާޅުވިއެވެ.
ޝާހިދު ވިދާޅުވީ، އޭނާގެ ސިޔާސީ ހަޔާތުގައި މިހާތަނަށް ރައީސް މުއިއްޒު ފަދަ، އިޚުލާސްތެރި، ތެދުވެރި، ވަފާތެރި، ރައްޔިތުންނާ ގާތް ރައީސަކު ދެކެވަޑައިނުގަންނަވާ ކަމަށެވެ.
“އަޅުގަނޑު ދޭން އޮތް ޔަގީންކަމަކީ މިއަދުގެ ސަރުކާރު، ﷲ އިރާދަކުރެއްވިއްޔާ ރައީސް ޑރ. މުހައްމަދު މުއިއްޒުގެ ޒައާމަތުގައި މި ދެ ރަށް ވެގެންދާނީ ދުބާއީއާއި އަބޫދާބީއަށޭ. މިއީ ސަމާސާ ވާހަކައެއް ނޫން،” ޝާހިދު ވިދާޅުވިއެވެ.
ހުޅުދުއާއި މީދޫގެ ރައްޔިތުންނަކީ ވަރަށް އެކުވެރި، ސަރުކާރަށް އެއްބާރުލުން ދޭ ބައެއް ކަމަށާއި ރައީސްގެ ހިތްޕުޅުގައި އެ ދެ ރަށުގެ ރައްޔިތުންނާ މެދު އޮންނަ ލޯބި އެނގިވަޑައިގަންނަވާ ކަމަށް އޭނާ ވިދާޅުވިއެވެ.
ކިޔުންތެރިންގެ ހިޔާލު