އަރަބި – އިސްލާމީ ގައުމުތަކުގެ ކުއްލި ސަމިޓު އޮންނާނީ ދޯހާގައި ހޯމަދުވަހު ކަމަށް، ގަތަރުން އިއުލާން ކޮށްފިއެވެ.
މިއީ، އިސްރާއީލުގެ ގަތަރުގެ ވެރިރަށް ދޯހާއަށް ދިން އުދުވާނީ ހަމަލާއާ ގުޅިގެން ބާއްވާ ކުއްލި ސަމިޓެކެވެ.
މި ސަމިޓުގައި، އިސްރާއީލުން ދޯހާއަށް ދިން ހަމަލާއާ ގުޅިގެން އަރަބި އިސްލާމީ ގައުމުތަކުން ގުޅިފައިވާ ބަޔާނެއް ފާސްކުރާނެއެވެ.
އަދި އިސްރާއީލާ ދެކޮޅަށް އަޅާނޭ ފިޔަވަޅުތަކެއްވެސް ކަނޑައަޅާނެ ކަމަށް ވެއެވެ.
ގަތަރުގެ ބޮޑުވަޒީރު ޝައިޚް މުހައްމަދު ބިން އަބްދުއްރަހްމާން ބިން ޖާސިމް އައްޘާނީ ކުރިން ވިދާޅުވެފައިވަނީ، އިސްރާއީލުން ދޯހާއަށް ދިން ހަމަލާގެ ރައްދު އަންނާނީ މުޅި ސަރަހައްދުން ކަމަށެވެ.
މަސްރަހް ދިރާސާކުރާ ފަރާތްތަކުންވެސް ބުނަމުންގެންދަނީ، އަރަބި އިސްލާމީ ގައުމުތަކުން އިސްރާއީލާ ދެކޮޅަށް އާރުލާ ފިޔަވަޅުތަކެއް މިފަހަރު އަޅާނެއެވެ.
އިސްރާއީލުގެ ކިބައިން ބަދަލުހިފަން ދުނިޔޭގެ އެތައް ބަޔަކު ގަތަރަށް ގޮވާލަމުން ގެންދާއިރު، އިއްޔެގެ ހުކުރު ނަމާދަށްފަހު ގަތަރުގެ މަގުތަކަށް އެތައް މިލިއަން މީހުން ނުކުމެ، އިސްރާއީލުގެ ހަމަލާ ކުށްވެރިކޮށް އަދި ބަދަލުހިފަން ސަރުކާރަށް ގޮވާލިއެވެ.
މެދުއިރުމަތީގައި އޮންނަ އެމެރިކާ ސިފައިންގެ އެންމެބޮޑު އަސްކަރީ ބޭސް ގާއިމްކޮށްފައިވަނީ ގަތަރުގައި އަލް އުބެއިދުގައި ނަމަވެސް، އިސްރާއީލުން ދޯހާއަށް ބެލިސްޓިކް މިސައިލް ހަމަލާދިން ވަގުތާ ދިމާކޮށް އެމެރިކާ ސިފައިން ތިބީ އަސްކަރީ ބޭހުގެ “މަތި ބަންދުކޮށްގެން” ދެނަހުރި ކަމަށް ނުހަދައެވެ.
އެ ބޭހުގައި ގާއިމްކޮށްފައިވާ މިސައިލުން ދިފާއުވާ އައްޑަނަވެސް ނިއްވާލައިގެންނެވެ.
އެހެންކަމުން، އެމެރިކާގެ އަސްކަރީ ބޭހެއް ގާއިމްކޮށްފައި އޮތުމަކުން އަދި އެމެރިކާއިން ސަލާމަތީ ގެރެންޓީ ދީފައި އޮތުމަކުން، އިސްރާއީލުގެ ފަރާތުން އަންނަ ނުރައްކަލެއް ނުހުއްޓުވޭނޭކަން އަރަބީންނަށް މިހާރު ކަށަވަރުވެފައިވާ ކަމަށް، ރިޕޯޓްތައް ބުނެއެވެ.
އެހެންވެ، އަރަބި ގައުމުތަކުގެ މިހާރުގެ ވިސްނުން ހުރީ، އެމެރިކާ ނޫންގޮތެއް ހޯދުމަށް ކަމަށް ވެއެވެ.
މި ހުރިހާ ކަމެއްގެ ކަންބޮޑުވުން ހުރުމާއެކުވެސް، ގަތަރުގެ ބޮޑުވަޒީރު ޝައިޚް މުހައްމަދު ބިން އަބްދުއްރަހްމާން ބިން ޖާސިމް އައްޘާނީ މިހާރުވެސް ވަޑައިގެން އުޅުއްވަނީ އެމެރިކާގައެވެ.
އެމެރިކާގެ ރައީސާއި، ނައިބް ރައީސާއި، ޚާރިޖީ ވަޒީރާވެސް އޭނާ ވަނީ ބައްދަލު ކުރައްވާފައެވެ.
ކިޔުންތެރިންގެ ހިޔާލު