ސައުތު އޭޝިއަން ސުޕަރކަޕްގައި، ދިވެހި ޤައުމީ ޓީމު ހޯދި ކާމިޔާބީއަށް ފަޚުރުވެރިވާ ކަން ހާމަކުރައްވާ ޤައުމީ ޓީމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މަރުޙަބާ ވިދާޅުވެއްޖެ އެވެ.
ކޮލަމްބޯގެ ރޭސްކޯސް އިންޓަރނޭޝަނަލް ސްޓޭޑިއަމްގައި މިއަދު ކުޅުނު މެޗު ނިމުނީ 1-1 އެއްވަރު ވެގެންނެވެ. ނަމަވެސް ރާއްޖެ އާއި ލަންކާ ކުޅުނު ފުރަތަމަ މެޗު 3-0 ގެ ނަތީޖާއަކުން ރާއްޖެ ކާމިޔާބު ކުރުމުން، މުބާރާތުގެ ޗެމްޕިއަންކަން ރާއްޖެއަށް ލިބިފައިވަނީ 4-1ގެ އެގްރިގޭޓުންނެވެ.
ދިވެހި ޤައުމީ ޓީމުގެ ފޮޓޯއަކާއެކު އެކްސްގައި ކުރެއްވި ޕޯސްޓެއްގައި ރައީސް ވިދާޅުވީ ސައުތު އޭޝިއަން ސުޕަރކަޕްގައި، ދިވެހި ޤައުމީ ޓީމު ހޯދި ކާމިޔާބީއަށް ފަޚުރުވެރިވާ ކަމަށެވެ. އަދި ޤައުމީ ޓީމަށް ސާބަސް ރައްދު ކުރައްވާފައިވެ އެވެ.
“ސައުތު އޭޝިއަން ސުޕަރކަޕްގައި، ދިވެހި ޤައުމީ ޓީމު ހޯދި ކާމިޔާބީއަށް ފަޚުރުވެރިވެ، އައްސަރިބަހާއި ސާބަސް ދަންނަވަން,” ރައީސްގެ ޕޯސްޓްގައި ވިދާޅުވެފައިވެ އެވެ.
މިއަދުގެ މެޗުގައިވެސް ރާއްޖެއިން ވަނީ މޮޅު ކުޅުމެއް ދައްކާފަ އެވެ. ފުރަތަމަ ލަނޑު ޖަހާ ލީޑް ހޯދީވެސް ރާއްޖެއިންނެވެ. ރާއްޖެއަށް ގޯލު ޖަހައިދިނީ ނާއިޒް ހަސަން އެވެ.
ކިޔުންތެރިންގެ ހިޔާލު