މޯލްޑިވްސް އިންޑަސްޓްރިއަލް ފިޝަރީޒް ކޮންޕެނީ ލިމިޓެޑް، މިފްކޯއިން ފުވައްމުލައް ސިޓީ ބަނދަރުން މަސްގަންނަން ފަށައިފިއެވެ.

މިފްކޯގެ ސީއީއޯ ފުވައްމުލައް ސިޓީއަށް ކުރެއްވިދަތުރުފުޅުގައި މި އޮގަސްޓް މަސް ނިމުމުގެ ކުރިން މިފްކޯއިން އެސިޓީގެ ބަނދަރުން މަސްގަންނާނެކަމަށް ވަނީ ވިދާޅުވެފައެވެ. މިދިޔަ ހޮނިހިރު ދުވަހު ފުވައްމުލައް ސިޓީ ބަނދަރުން މަސްގަތުމަށްޓަކައި މިފްކޯގެ “ރަނދި 19” ބޯޓު އެސިޓީގެ ބަނދަރަށް ގެންގޮސް މަސްގަތުމުގެ އިންތިޒާމުތައް ވަނީ ހަމަޖައްސާފައެވެ. މިފްކޯގެ “ރަނދި 19” ބޯޓަކީ 36 މެޓްރިކްޓަނުގެ މަސްކިރުވައި ރައްކާކުރެވޭ ޖާގައިގެ ބޯޓެެކެވެ.

ފުވައްމުލައް ހިމެނޭ ސަރަހައްދަކީ ކަންނެލީގެ މަސްވެރިކަން ރަނގަޅުކަމަށް ފާހަގަކުރެވޭ ސަރަހައްދަކަށްވުމާއިއެކު، މިފްކޯއިން ފުވައްމުލައް ސަރަހައްދަށް ޚާއްސަކޮށްގެން މިފެށި އޮޕަރޭޝަނާއެކު މިފްކޯއަށްކިރުވާ މަހުގެ އަދަދު އިތުވެގެންދާނެކަމަށް އެކުންފުނިން ވަނީ ވިދާޅުވެފައެވެ. މިސަރަހައްދުގެ މަސްވެރިންނަށް ލުއިފަސޭހަކަމާއެކު މެދުނުކެނޑި މަސްކިރުވުމުގެ އިންތިޒާމު މިފްކޯގެ “ރަނދި 19” ބޯޓު ދާއިމީކޮށް ހަމަޖެހިގެންދާނެކަމަށް މިފްކޯއިން ވިދާޅުވިއެވެ.

މަސްވެރިކަމުގެ ސިނާއަތާއި، މަސްވެރިން ކުރަމުންދާ މަސައްކަތްތައް ފައިދާހުރި ދެމެހެއްޓެނިވި މަސައްކަތްތަކަކަށް ހެދުމުގެ އަމާޒުގައި މިފްކޯއިން ދަނީ އެކުންފުނީގެ އޮޕަރޭޝަންތައް ފުޅާކުރަމުންނެވެ. އެގޮތުން ފެލިވަރު ކޭނަރީގެ އަވަސް މަރާމާތާއި މެއިންޓަނަންސްގެ މަސައްކަތްތައް މިހާރު ވަނީ ފަށާފައެވެ. އަދި ގދ. ތިނަދޫގައި ޤާއިމުކުރަން ފަށާފައިވާ މަސް ގަންނަ މަރުކަޒު، 2026ވަނަ އަހަރުގެ ފަހުކޮޅު ހުޅުވާ، އޮޕަރޭޝަނަށް ގެނައުމަށާއި އުތުރާއި ދެކުނުގައި ބާނާ ބޮޑުކަންނެލި މިފްކޯއަށް ގަތުމުގެ ތައްޔާރީތައްވެސް މިއަހަރުތެރޭ ފަށަން ތައްޔާރުވަމުން އަންނަކަމަށް މިފްކޯއިން މައުލޫމާތުދެއެވެ.