މޯލްޑިވްސް އިންލޭންޑް ރެވެނިއު އޮތޯރިޓީ (މީރާ) އިން 2022 ވަނަ އަހަރުގެ ނޮވެމްބަރު މަހާ ހަމައަށް މުދަލާއި ޚިދުމަތުގެ އަގުން ނަގާ ޓެކްސް (ޖީއެސްޓީ) ނުދައްކާ 146 ފަރާތެއްގެ މަޢުލޫމާތު ޢާންމުކޮށްފިއެވެ.
މީރާއިން މި މަޢުލޫމާތު ހާމަކޮށްފައިވަނީ ޓެކްސް ދެއްކުމަށް ކަނޑައެޅިފައިވާ މުއްދަތުގައި ޓެކްސް ނުދައްކާ ފަރާތްތަކުގެ ތެރެއިން، ދައްކަންޖެހޭ ޓެކުހުގެ އަދަދު 600,000 ރުފިޔާއަށް ވުރެ މަތީ ފަރާތްތަކުގެ ނަންތަކެވެ. މި ފަރާތްތަކުން ޖުމްލަ 87.6 މިލިއަން ރުފިޔާއަށްވުރެ ގިނަ އަދަދެއް ދައްކަންޖެހޭ ކަމަށް މީރާއިން ލަފާކުރެއެވެ.
މި ލިސްޓުގައި ހިމެނެނީ ރާއްޖޭގައި ހޯލްސޭލް ވިޔަފާރިކުރާ ކުންފުނިތަކާއި، މަޝްހޫރު އުޅަނދު ވިއްކާ ވިޔަފާރިތައް ފަދަ ތަންތަން ހިމެނޭ ގޮތަށެވެ. މީރާއިން މި މަޢުލޫމާތު ހާމަކޮށްފައިވަނީ އެ ފަރާތްތަކަށް ތަކުރާރުކޮށް ހަނދާންކޮށްދީ، އެކި ބާވަތުގެ ނޯޓިސްތައް ފޮނުވައި، އިތުރު މުއްދަތުތަކާއި ފުރުސަތުތައް ދިނުމަށްފަހުގައެވެ.
މީރާއިން ވަނީ ޓެކްސް ދެއްކުމަށް އެކި ބާވަތުގެ ލުއިފަސޭހަތައް ތަޢާރަފުކޮށްފައެވެ. މީގެ ތެރޭގައި އެއްފަހަރާ ފައިސާ ދެއްކެން ނެތް ފަރާތްތަކަށް އިންސްޓޯލްމަންޓް އުސޫލުން ބަހާލައިގެން ފައިސާ ދެއްކުމުގެ ފުރުސަތު ހިމެނެއެވެ. މިފަދަ އެއްބަސްވުންތަކަށް ޢަމަލުކުރާ ފަރާތްތަކާ މެދު އިތުރު ތަންފީޛީ ފިޔަވަޅު ނޭޅޭނެ ކަމުގެ ޔަޤީންކަން މީރާއިން ދެއެވެ.
މީރާއިން ވަނީ ޓެކްސް ދެއްކުމުގައި ލުއިތައް ދިނުމަކީ ޓެކްސް ދައްކާ މިންވަރު އިތުރުވާނެ ކަމެއްކަން ފާހަގަކޮށް، ދުރާލާ ޓެކްސް ބަޔާންތައް ހުށަހެޅުމަށް ސަމާލުކަން ދިނުމަށް އިލްތިމާސްކޮށްފައެވެ.
ކިޔުންތެރިންގެ ހިޔާލު