މީދޫއަށް ފޯރުކޮށްދެވުނީ 1 މެގަވޮޓްގެ ޖަނަރޭޓަރު ސެޓެކެވެ. މިހާރު އެ ރަށުގައި ބޭނުންކުރަމުންދަނީ 800 ކިލޯވޮޓް، 500 ކިލޯވޮޓް އަދި 300 ކިލޯވޮޓްގެ ޖަނަރޭޓަރުތަރުތަކެކެވެ. ނަމަވެސް، މީގެ ތެރެއިން ކުޑަ ދެ ޖަނަރޭޓަރު އެކަށީގެންވާ ގޮތެއްގައި ބޭނުން ނުކުރެވޭކަމަށް ކައުންސިލުން ފާހަގަކުރައްވައެވެ. އާ ޖަނަރޭޓަރާއެކު، ރަށުގެ ކަރަންޓުގެ ޚިދުމަތް މެދުނުކެނޑި ފޯރުކޮށްދިނުން ޔަޤީންވާނެކަމަށް ކައުންސިލުން ވިދާޅުވެފައިވެއެވެ.

މަޑުއްވަރީއަށް ފޯރުކޮށްދެވުނީ 800 ކިލޯވޮޓްގެ ޖަނަރޭޓަރު ސެޓެކެވެ. މިހާރު އެ ރަށުގައި ބޭނުންކުރަމުންދާ 3 ޖަނަރޭޓަރުގެ ތެރެއިން 2 ޖަނަރޭޓަރު ދުވަސްވެ ބާވެފައިވާތީ، އާ ޖަނަރޭޓަރާއެކު ރަށުގެ ކަރަންޓުގެ ދެމެހެއްޓެނިވިކަން ޔަޤީންވާނެކަމަށް ކައުންސިލުން ވިދާޅުވެފައިވެއެވެ.

ފެނަކަ ކޯޕަރޭޝަނުން މަޢުލޫމާތު ދެއްވާފައިވާ ގޮތުގައި، މި ޖަނަރޭޓަރު ސެޓުތައް އިންސްޓޯލްކުރުމުގެ މަސައްކަތް އަވަހަށް ނިންމާލެވޭނެއެވެ. ނިމިދިޔަ 2024 ވަނަ އަހަރު ފެނަކައިން ވަނީ ރާއްޖޭގެ 53 ރަށަކަށް 61 ޖަނަރޭޓަރު ސެޓު ފޯރުކޮށްދީފައެވެ. މިހާރު ފެނަކައިން ދަނީ ރާއްޖޭގައި މީހުން ދިރިއުޅޭ 157 ރަށަކަށް ކަރަންޓުގެ ޚިދުމަތް ފޯރުކޮށްދެމުންނެވެ.