ނަން-އެލައިންޑް މޫވްމެންޓް (ނާމް)ގެ މެންބަރު ގައުމުތަކުން އެއްބައިވެ، ސުލްހަ އާއި އިސްތިގުލާލާއި އިންސާފު ދިފާއުކުރުމަށް، ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ގޮވާލައްވައިފިއެވެ.
އުޒްބަކިސްތާނުގެ ތަޝްކެންޓުގައި ކުރިއަށްދާ އިންޓަ ޕާލިމެންޓަރީ ޔުނިއަންގެ 150 ވަނަ އެސެމްބްލީގެ ހަވާސާގައި ކުރިއަށްދާ ނަން-އެލައިންޑް މޫވްމެންޓް ޕާލިމެންޓަރީ ނެޓްވޯކްގެ ހަތަރުވަނަ ކޮންފަރެންސްގެ “ބަންޑުންގް އުސޫލުތަކަށް 70 އަހަރު ފުރުން: ބަންޑުންގް އުސޫލުތައް ދެމެހެއްޓުމުގައި މަޖިލިސްތަކުގެ ދައުރު” މައުޟޫއަށް ވާހަކަދައްކަވަމުން އަބްދުއްރަހީމް ވަނީ ބަންޑުންގް އުސޫލުތައް ދެމެހެއްޓުމަށް ރާއްޖެއިން ކުރަމުންދާ މަސައްކަތް ފާހަގަކުރައްވައިފައެވެ.
އަބްދުއްރަހީމް ވަނީ މިނިވަންކަމާއި ސިޔާދަތާއި އިސްތިގުލާލާއި، ބައިނަލްއަގުވާމީ އެއްބާރުލުމުގެ އަގުތައް ދެމެހެއްޓުމަށް ޕާލިމެންޓަރީ ފިޔަވަޅުތަކެއް އަލުން އެޅުމަށް ގޮވާލައްވައިފައެވެ. އަދި މިއަދުގެ ދުނިޔޭގައި ދިމާވާ ގޮންޖެހުންތަކަށް ހައްލެއް ހޯދައިދިނުމުގައި، ނުފޫޒު ނުފޯރުވުމާއި، ސުލްހަވެރިކަމާއެކު މައްސަލަތައް ހައްލުކުރުމާއި، ވިޔަފާރިއާއި ސަގާފަތުގައި އެއްބާރުލުން ދިނުމުގެ ބޭނުން ހިފުމުގައި ބަންޑުންގް އުސޫލުތަކުގެ މުހިންމުކަން އަބްދުއްރަހީމް ފާހަގަކުރެއްވިއެވެ.
މަޖިލީހުގެ ރައީސް އަބްދުއްރަހީމް ވަނީ “ނާމް” މެންބަރު ގައުމުތަކުން އެއްބައިވެ، ސުލްހަ އާއި އިސްތިގުލާލާއި އިންސާފު ދިފާއުކުރުމަށް ވެސް ގޮވާލައްވައިފައެވެ.
ކުދި ޖަޒީރާ ގައުމުތަކުގެ ނާޒުކުކަމަށް އަލިއަޅުއްވާލައްވަމުން މަޖިލީހުގެ ރައީސް ވަނީ މޫސުމަށް އަންނަ ބަދަލުތަކާ ގުޅޭގޮތުން ދުނިޔޭގެ އެއްބާރުލުން ދިނުމަށް ގޮވާލައްވައިފައެވެ. އެކަމަކީ ރާއްޖެއަށް ސީދާ ގޮތެއްގައި އަސަރުކުރާ އަދި ދުވަހުން ދުވަހަށް ނުރައްކާތެރިކަން އިތުރުވަމުންދާ ކަމެއް ކަމަށް ފާހަގަކުރައްވައި، އެންމެ ބޮޑަށް ނުރައްކާތެރިކަމުގެ ތެރޭގައިވާ ގައުމުތަކަށް ތިމާވެށީގެ އިންސާފު ގާއިމުކުރުމަށް ނާމްގެ މެންބަރު ގައުމުތަކުން ދޭ އަހައްމިއްޔަތުކަން އިތުރަށް ހަރުދަނާކުރަން ޖެހޭ ކަމަށް އަބްދުއްރަހީމް ވިދާޅުވިއެވެ.
ކިޔުންތެރިންގެ ހިޔާލު