ޢީދު ފާހަގަކުރުމުގެ ގޮތުން ސެންޓްރަލް ޕާކުގައި ޑްރޯން ޝޯއަކާއި ހަވާއެރުވުމުގެ ހަރަކާތެއް ބޭއްވިއްޖެއެވެ.
ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން އިންތިޒާމުކޮށްގެން ބޭއްވި މި ހަރަކާތްތަކުގެ ތެރެއިން، ޑްރޯން ޝޯ ކުރިއަށް ގެންދެވުނީ އިއްޔެ ރޭ 20:30 ގައި ސެންޓްރަލް ޕާކުގައެވެ. މި ޝޯ 30 މިނެޓުގެ މުއްދަތަށް ކުރިއަށް ގެންދެވުނެވެ.
ޑްރޯން ޝޯގައި އިސްލާމީ ޝިޢާރުތަކާއި، ދިވެހި ސަގާފަތާ ގުޅުންހުރި މަންޒަރުތަކުގެ އިތުރުން އެޗްޑީސީއާ ގުޅުންހުރި ތަސްވީރުތައް ދެއްކުނެވެ. އަދި ފަލަސްތީނުގެ މުސްލިމު އަޚުންނާއި އުޚްތުންގެ ހަނދާން އާކުރުމުގެ ގޮތުން، ފަލަސްތީނުގެ ދިދަ ހިތެއްގެ ސިފައިގައި ދައްކާލެވުނެވެ. ޑްރޯން ޝޯގެ ފަހުން ސެންޓްރަލް ޕާކުގައި ހަވާއެރުވުމުގެ ހަރަކާތެއްވެސް ކުރިއަށް ގެންދެވުނެވެ. މި ހަރަކާތްތައް ބަލައިލުމަށް ގިނަ އަދަދެއްގެ ރައްޔިތުން އެ ސަރަޙައްދަށް ޖަމާވިއެވެ.
ޢީދު ފާހަގަކުރުމުގެ ގޮތުން މާލޭގައި އިތުރު ގިނަ ހަރަކާތްތަކެއް ކުރިއަށް ގެންދިއުމަށް ވަނީ ރޭވިފައެވެ.
ކިޔުންތެރިންގެ ހިޔާލު