މާލޭގައި ކާބޯތަކެތީގެ ވިޔަފާރިކުރާ ގެއަކުން 32 ބިދޭސީއަކު އިމިގްރޭޝަންގެ ބެލުމުގެ ދަށަށް ގެންގޮސްފިއެވެ.

އިމިގްރޭޝަނުން މިއަދު އެކްސްގައި ކުރި ޕޯސްޓެއްގައި ބުނީ ‘އިމްގްރޭޝަން ވޮޗް’އަށް ލިބުނު ރިޕޯޓަކާ ގުޅިގެން މިމަހުގެ ފަސްވަނަ ދުވަހު ހިންގި އޮޕަރޭޝަނެއްގައި ބަލައި ފާސްކޮށްފައިވަނީ ‘މއ. ހިތިލާގެ 2’ ކަމަށެވެ.

އެ ގޭގައި ދިރިއުޅެމުންދިޔަ 77 ބިދޭސީންގެ ލިޔެކިޔުންތައް ބަލައި ފާސްކޮށް، އިމިގްރޭޝަންގެ ބެލުމުގެ ދަށަށް ގެންދިޔަ 32 މީހުންގެ ތެރޭގައި ހިމެނެނީ ސައްހަ ވިސާއެއް ނެތި ގަވާއިދާ ހިލާފަށް މަސައްކަތްކުރަމުންދިޔަ މީހުންނާއި، ވަޒީފާ ދިން ފަރާތަށް ފިލައިގެން އުޅޭ މީހުން ކަމަށް އިމިގްރޭޝަނުން ބުންޏެވެ.

އިމިގްރޭޝަނުން ބުނީ އެ ގޭގައި ގަނޑުކުރި މަސް، ތަރުކާރީ އަދި އެހެނިހެން ކާނާގެ ބާވަތްތައް ސަޕްލައިކުރާ މަންޒަރު އަބަދުވެސް ފެންނަ ކަމަށް ރިޕޯޓުކޮށްފައިވާ ކަމަށާއި ގިނަ އަދަދެއްގެ ގޭސް ސިލިންޑަރު ވެސް މި އިމާރާތަށް ގެންދާ ކަމަށް ވެސް ރިޕޯޓުކޮށްފައިވާ ކަމަށެވެ. އަދި މެންދުރު ކާ ގަޑިއަށް ގިނަ އަދަދެއްގެ ބަތް ޕާރުސަލް ޑެލިވާކުރަން އެ އިމާރާތުން މީހުން ނުކުންނަ މަންޒަރު ފެންނަ ކަމަށް ވެސް ރިޕޯޓުކޮށްފައިވާ ކަމަށް އިމިގްރޭޝަނުން ބުންޏެވެ.

އެ ގެއަކީ ގިނަ އަދަދަކަށް އެއްފަހަރާ ކެއްކުމުގެ އިތުރުން ގިނަ އަދަދެއްގެ ބިދޭސީން ހުރުމުގެ އިންތިޒާމު ހަމަޖައްސާފައިވާ ތަނެއްކަން ވެސް ރިޕޯޓުގައިވާ ކަމަށާއި އެ މީހުން ދިރިއުޅެމުންދިޔަ ގެއަކީ އާދައިގެ ގޮތަކަށް ޑެކް އަޅައިގެން ހަތަރު ބުރިއަށް ހަދާފައިވާ ބާ އިމާރާތެއް ކަމަށް އިމިގްރޭޝަނުން ބުންޏެވެ.