ޣައްޒާއަށް އިންސާނީ އެހީތެރިކަން ފޯރުކޮށްދިނުމަށް ހުރި ހުރިހާ މަގުތަކެއް އިސްރާއީލުން ވަނީ ބަންދުކޮށްފައެވެ. މި ފިޔަވަޅަކީ ގާޒާގެ ރައްޔިތުންގެ ދަތި ހާލަތު އިތުރަށް ގޯސްކޮށް، އިންސާނީ އެހީތެރިކަމުން އެ ސަރަހައްދުގެ އާންމު ރައްޔިތުން މަހުރޫމުކުރުމަށް އަޅާފައިވާ ފިޔަވަޅެކެވެ.
އެމެރިކާއިން ހުށަހަޅާފައިވާ ހަނގުރާމަ ހުއްޓުވުމުގެ އެއްބަސްވުން އިތުރުކުރުމުގެ ޕްލޭނަށް އެއްބަސްވުމަށް އިސްރާއީލުން ވަނީ ޝަރުތުތަކެއް ކަނޑައަޅާފައެވެ. މިސްރު، ގަތަރު އަދި އެމެރިކާގެ މެދުވެރިކަމާއެކު ހިންގުނު ހަނގުރާމަ ހުއްޓުވުމުގެ އެއްބަސްވުމުގެ ފުރަތަމަ މަރުހަލާ ހޮނިހިރު ދުވަހު ނިމިފައިވާއިރު، އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ވަނީ ހަމާސްއިން އެ އެއްބަސްވުން އިތުރުކުރުމަށް ހުށަހަޅާފައިވާ ހުށަހެޅުން ބަލައިނުގަންނާނެކަމަށް ވިދާޅުވެފައެވެ.
ހަމާސްގެ ރަސްމީ ތަރުޖަމާނު ވަނީ އިސްރާއީލުން މިހާރު ގާޒާއަށް އިންސާނީ އެހީތެރިކަން ފޯރުކޮށްދޭ މަގުތައް ބަންދުކޮށް، ބްލެކްމެއިލްކުރަމުންދާ ކަމަށާއި، މިއީ ބައިނަލްއަޤްވާމީ ޤާނޫނުތަކާ ޚިލާފު ޢަމަލެއް ކަމަށް ބުނެފައެވެ.
ހަނގުރާމަ ހުއްޓުވުމުގެ އެއްބަސްވުމުގެ ފުރަތަމަ މަރުހަލާ ނިމިފައިވާއިރު، ދެވަނަ މަރުހަލާގެ މަޝްވަރާތަކުގައި ހަމާސްއިން ވަނީ އަސީރުންގެ ގޮތުގައި ހިފަހައްޓާފައިވާ އެންމެން ދޫކޮށްލުމަށް ޝަރުތުކޮށްފައެވެ. އަދި އިސްރާއީލުން ވަނީ ގާޒާއިން މުޅިން ފައިބައިގަތުމަށް ނިންމާފައެވެ.
ނަމަވެސް، ހަމާސްއިން ވަނީ އިސްރާއީލުން ދެވަނަ މަރުހަލާގައި ހުށަހަޅާފައިވާ ޝަރުތުތަކަށް ޢަމަލުކުރާނެކަމުގެ އެއްވެސް އުއްމީދެއް ނެތްކަމަށް ބަޔާންކޮށްފައެވެ.
ކިޔުންތެރިންގެ ހިޔާލު