ރައްޔިތުންގެ މަޖިލީހުގެ މެމްބަރުންނަށް ގާނޫނީ ދާއިރާއިން ޑިގްރީއަށް ކިޔެވުމުގެ ފުރުޞަތު ދިވެހިރާއްޖޭގެ އިސްލާމީ ޔުނިވަރސިޓީ (އައިޔޫއެމް) އިން ހުޅުވާލައިފިއެވެ. މި ޕްރޮގްރާމް ފަށައިގަންނަނީ މަޖިލީހާއި އައިޔޫއެމްއާ ދެމެދު ވެވުނު އެއްބަސްވުމެއްގެ ދަށުންނެވެ.
އައިޔޫއެމްގެ އިސް އޮފިޝަލެއް މުޅިރާއްޖެ އަށް މަޢުލޫމާތު ދެއްވިގޮތުގައި، މިހާރު މަޖިލީހުގައި ތިއްބެވި މެމްބަރުންގެ ތެރެއިން ޝަރީޢާ އެންޑް ލޯގެ ޑިގްރީ ޕްރޮގްރާމުގައި ބައިވެރިވުމަށް ޝަރުތު ހަމަވާ ބޭފުޅުން އެބަތިބިއެވެ. އަދި ދެ ހަފްތާގެ ތެރޭގައި މަޖިލިސް މެމްބަރުންނަށް ޚާއްޞަކޮށްގެން މި ޑިގްރީ ކޯސް ފެށުމަށް ތައްޔާރުވަމުންދާ ކަމަށް އެ އޮފިޝަލް ވިދާޅުވިއެވެ.
“މި ޕްރޮގްރާމް ކުރިއަށް ގެންދާނީ މަޖިލިސް މެމްބަރުންނަށް ފަސޭހަވާނެ ގަޑިތަކުގައި. އަޅުގަނޑުމެން ބޭނުންވަނީ މެމްބަރުންގެ މަސައްކަތަށް ދަތިނުވާނެ ގޮތަކަށް މި ފުރުޞަތު ފޯރުކޮށްދޭން،” އެ އޮފިޝަލް ވިދާޅުވިއެވެ.
Advertisement
މީގެ އިތުރުން، އައިޔޫއެމްއިން ހިންގާ އެޑްވާންސްޑް ސެޓްފިކެޓް އިން ޝަރީޢާ އެންޑް ލޯ ކޯހެއްގައި މަޖިލީހުގެ އަށް މެމްބަރަކު މިހާރު ވަނީ ބައިވެރިވެ ކިޔަވަން ފަށާފައެވެ. މި ޕްރޮގްރާމަކީވެސް ސީދާ މަޖިލިސް މެމްބަރުންނަށް ޚާއްޞަކޮށްގެން އޮންލައިންކޮށް ފެށި ޕްރޮގްރާމެކެވެ.
އެއް އަހަރު ދުވަހަށް ކުރިއަށްގެންދާ އެޑްވާންސްޑް ސެޓްފިކެޓް ޕްރޮގްރާމް ނިންމާ މެމްބަރުންނަށް، ޑިގްރީ ޕްރޮގްރާމުގައި ބައިވެރިވުމުގެ ފުރުޞަތު ލިބޭނެ ކަމަށްވެސް އެ އޮފިޝަލް ފާހަގަކުރެއްވިއެވެ.
މި އިސްނެގުމަކީ މަޖިލިސް މެމްބަރުންގެ ޤާނޫނީ ހުނަރު އިތުރުކޮށް، ޤާނޫނު ހެދުމުގެ މަސައްކަތް އިތުރަށް ހަރުދަނާކުރުމަށް އެޅޭ މުހިންމު ފިޔަވަޅެއް ކަމަށް ބެލެވެއެވެ. މަޖިލީހުގެ ސްޕީކަރ އަބްދުއްރަހީމް އަބްދުﷲ މި ކަމާ ގުޅޭގޮތުން ދެއްވި ބަޔާނެއްގައި ވިދާޅުވީ، މި ފުރުޞަތަކީ މެމްބަރުންގެ ޤާބިލުކަން އިތުރުކޮށް، ރައްޔިތުންނަށް އިތުރު ޚިދުމަތްތަކެއް ފޯރުކޮށްދިނުމަށް މަގުފަހިވެގެންދާނެ ކަމެއް ކަމަށެވެ.
ކިޔުންތެރިންގެ ހިޔާލު