ކުރީސަރުކާރުން ފެނަކަ ކުންފުނީގެ ބޮލުގައި އަޅުވފައިވަ ބޮޑު ދަރަނީގެ ތެރެއިން ބޮޑު ބައެއް ރޯދަމަހުގެ ކުރިން ދައްކާ ޚަލާސްކުރެވޭނެ ކަމަށް އެކުންފުނީގެ މެނޭޖިންގ ޑިރެކްޓަރ މުހައްމަދު ނަޖާހް ވިދާޅުވެއްޖެއެވެ. މިސަރުކާރުން ވެރިކަމާއި ހަވާލުވީ އިރު، ފެނަކާގައި 4.3 ބިލިޔަން ރުފިޔާގެ ދަރަންޏެއް އޮތެވެ. ފެނަކައަށް ދާދި އިހަކަށްދުވަހު އައްޔަންކުރި މެނޭޖިންގ ޑިރެކްޓަރ މުހައްމަދު ނަޖާހް ވިދާޅުވީ:-
ފެނަކައަށް މިހާރު ލިބޭފައިސާއިން އަޅުގަނޑުމެންނަށް މިތަން މާރަގަޅަށްވެސް ހިންގޭނެ. އެހެންނަމަވެސް، ބިޔަ ބޮޑު ދަރަނީގެ ބޮޑު ބެކްލޮގެއް މިއަންނަނީ. އެކަމުގައި އަޅުގަނޑުމެން މިހާރު މިގެންދަނީ އިތުރަށް މަޝްވަރާ ކުރަމުން. ފިނޭސް މިނިސްޓްރީއާއެކު ވެސް މަޝްވަރާކުރަމުން ދަނީ. ރައީސުލްޖުމްހޫރިއްޔާވެސް ވިދާޅުވެފައި އޮތީ ރޯދައިގެ ކުރިން އަޅުގަނޑުމެންނަށް ފަންޑަސް ހަމަޖައްސައި ދެއްވާނެ ކަމަށް. އިރާދަ ކުރެއްވީއްޔާ ރޯދައިގެ ކުރިއަށް ދަރަނީގެ ކަންކަން ހައްލުވާނެ. އޭރު ރަށްރަށަށް ޚިދުމަތް ދިނުމަށް ފޯކަސް ކުރެވޭނެ ދަތިކަމެއްނެތި އޮޕްރޭޓް ކުރެވޭނެ.
ސަރުކާރު ކުންފުނިތަކުގެ ތެރެއިން، އެންމެ ބޮޑު އެއް ދަރަންޏެއް އޮތް ކުންފުންޏަކީ ފެނަކައެވެ. ކުންފުނީގެ ދަރަނި އިންތިހާއަށް ބޮޑުވެ، އެތައް ބަޔަކު ދިޔައީ ޝަކުވާ ކުރަމުންނެވެ. އޭރު ސަރުކާރުން އަމާޒަކަށްވީ ކުންފުނީގެ ހިނގުން ހަރުދަނާކޮށް ކުންފުނި “ރައިޓް ސައިޒް” ނުވަތަ ނުތަކާވަރަށް ޚަރަދު ބޮޑުވެފައިވާ ކުންފުނި އެކަށީގެންވާ މިންގަނޑަކަށް ފެއްތުމެވެ. ފެނަކަ ކުންފުނީގެ ކުރީގެ މެނޭޖިން ޑިރެޓަރ މުއާޒް ރަޝީދު އިސްތިއުފާ ދީފައިވަނީ މިދަރަނި އަދާކުރެވޭނެ ގޮތެއްނެއްކަމަށް ވިދާޅުވެފައެވެ.
ކިޔުންތެރިންގެ ހިޔާލު