އެކިއު ވެދަރ އިން އަންދާޒާ ކުރާ ގޮތުގައި ލޮސް އެންޖެލެސްގެ އަލިފާނުގެ ހާދިސާއިން 250 ބިލިއަން ޑޮލަރަށްވުރެ ގިނަ އަދަދެއްގެ ގެއްލުމާއި އިޤްތިޞާދީ ގެއްލުން ވެފައިވެއެވެ. މި ގެއްލުމުގެ ބޮޑުމިން އަޅާކިޔުމަށްޓަކައި، މި އެންމެ ފަހުގެ ގެއްލުމާއި އިޤްތިޞާދީ ގެއްލުމުގެ އަންދާޒާއަކީ 2020 ވަނަ އަހަރުގެ މުޅި އަލިފާނުގެ މޫސުމުގެ އަދަދުތަކަށްވުރެ ބޮޑު އަދަދެކެވެ.
ދެކުނު ކެލިފޯނިއާގައި އަލިފާން ރޯވަމުންދާއިރު އަދި ބޮޑެތި ގެއްލުންތަކާއި، މަރުވުމާއި، ވިޔަފާރިތަކަށް ދިމާވާ ދަތިތަކާއި އެހެނިހެން އިޤްތިޞާދީ އަސަރުތައް އިތުރަށް ސާފުވަމުންދާތީ، އެކިއު ވެދަރ އިން ވަނީ އެ ފަރާތުގެ އިބްތިދާއީ އަންދާޒާ އަޕްޑޭޓްކޮށް، ޖުމްލަ ގެއްލުމާއި އިޤްތިޞާދީ ގެއްލުން 250 ބިލިއަން ޑޮލަރާއި 275 ބިލިއަން ޑޮލަރާ ދެމެދުގެ އަދަދަކަށް އިތުރުކޮށްފައެވެ.
މި އަވަހަށް ފެތުރެމުންދާ، ވައިން ދުއްވާލާ އަލިފާނުގެ ކާރިސާތަކަކީ މި ޒަމާނުގެ އެމެރިކާގެ ތާރީޚުގައި އެންމެ ބޮޑެތި ގެއްލުންތައް ލިބުނު އަލިފާނުގެ ކާރިސާތަކުގެ ތެރެއިން އެއް ކާރިސާއެވެ. އެކިއު ވެދަރގެ ޗީފް މީޓިއޮރޮލޮޖިސްޓް ޖޮނަތަން ޕޯޓަރ ވިދާޅުވީ:-
ހަރިކޭނެއްގެ ބާރުމިނުގައި ޖެހުނު ވައިތަކުން މިލިއަން ޑޮލަރުތަކުގެ އަގުހުރި ގެތަކުން ފުރިފައިވާ ހިސާބުތަކުގައި އަލިފާން ރޯވެގެން ދިޔަ. މީގެ ސަބަބުން ދިމާވި ގެއްލުންތަކަކީ ހިތާމަވެރި ގެއްލުންތަކެއް އަދި އިޤްތިޞާދީ ގޮތުން ލިބުނު ގެއްލުމަކީ ވަރަށް ބޮޑު ގެއްލުމެއް.
އެންމެ ނުރައްކާތެރި އަލިފާނުގެ ހާދިސާތައް ހިނގަމުންދަނީ ސަންޓަ މޮނިކާއިން މަލިބޫއަށް ހުރި ސަރަޙައްދުގައެވެ. މިއީ ޤައުމުގެ އެންމެ އަގުބޮޑު ގޯތިގެދޮރު ހުރި ސަރަޙައްދުތަކުގެ ތެރެއިން ސަރަޙައްދެކެވެ. މި ސަރަޙައްދުގެ މެދުމިނުގެ ގެއެއްގެ އަގަކީ 2 މިލިއަން ޑޮލަރަށްވުރެ ބޮޑު އަދަދެކެވެ. ޕޯޓަރ އިތުރަށް ވިދާޅުވީ:-
ކުރިއަށް އޮތް ދުވަސްތަކުގައި އިތުރު ގިނަ އަދަދެއްގެ އިމާރާތްތަކަށް އަލިފާނުގެ އަސަރުކޮށްފިނަމަ، މިއީ އިމާރާތްތަކަށް ލިބުނު ގެއްލުމާއި އިޤްތިޞާދީ ގެއްލުމުގެ ގޮތުން ބަލާއިރު މި ޒަމާނުގެ ކެލިފޯނިއާގެ ތާރީޚުގައި އެންމެ ނުރައްކާތެރި އަލިފާނުގެ ހާދިސާ ކަމުގައި ވެދާނެ.
ގެއްލުމުގެ ބޮޑުމިން އަޅާކިޔުމަށްޓަކައި، ދެކުނު ކެލިފޯނިއާގައި މިހާރު ރޯވަމުންދާ އަލިފާނުގެ ސަބަބުން ލިބުނު ގެއްލުމާއި އިޤްތިޞާދީ ގެއްލުމުގެ އެންމެ ފަހުގެ އަންދާޒާއަކީ، ވަރަށް ގިނައިން އަލިފާން ރޯވި 2020 ވަނަ އަހަރުގެ މުޅި އަލިފާނުގެ މޫސުމުގައި ލިބުނު ގެއްލުމާއި އިޤްތިޞާދީ ގެއްލުމުގެ އަދަދުތައް ފަހަނައަޅައި ގޮސްފައިވާ އަދަދެއްކަމަށް ޕޯޓަރ ފާހަގަކުރެއްވިއެވެ.
ލޮސް އެންޖެލެސްއަށް ލިބުނު ގެއްލުމާއި އިޤްތިޞާދީ ގެއްލުމަކީ 2023 ވަނަ އަހަރު މާއުއީގައި ހިނގި މަރުވެރި އަލިފާނުގެ ހާދިސާގައި ލިބުނު 13 ބިލިއަނުން 16 ބިލިއަނަށްވުރެ މާ ބޮޑު އަދަދެކެވެ. އަދި 2024 ވަނަ އަހަރުގެ ހަރިކޭން ހެލީންގެ ސަބަބުން ލިބުނު ގެއްލުމާއި އިޤްތިޞާދީ ގެއްލުމުގެ އަެއްލުމުގެ އަންދާޒާކަމުގައިވާ 225 އިން 250 ބިލިއަން ޑޮލަރުގެ އަދަދުވެސް ފަހަނައަޅައި ގޮސްފައެވެ.
ކިޔުންތެރިންގެ ހިޔާލު