އައްޑޫ އިކްއެޓޯރިއަލް ހޮސްޕިޓަލް (އޭއީއެޗް) އިސްނަގައިގެން އިންތިޒާމުކުރާ "އޮކިއުޕޭޝަނަލް ސޭފްޓީ އެންޑް ހެލްތު ކޮންފަރެންސް" މިއަދު ވަނީ ފަށާފައެވެ. ދެ ދުވަހަށް ދެމިގެންދާ މި ބައްދަލުވުން އިންތިޒާމުކޮށްފައިވަނީ ސ. ހިތަދޫގައި ހުންނަ އައްޑޫ ހައި ސްކޫލްގައެވެ.

މިއީ ދައުލަތުގެ ސިޔާސަތުތައް އެކަށައަޅާ ފަރާތްތަކާއި، ވަޒީފާ ދޭ ފަރާތްތަކުގެ އިތުރުން މުވައްޒަފުންނާއި، އެކި ސިނާއަތްތަކުގެ އިސް މަސްއޫލުވެރިންނާއި، ސަލާމަތީ ކަންކަމާ ގުޅޭ ތަޖުރިބާކާރުން އެއް މޭޒަކަށް ގެނެސްދޭ މުޅި ރާއްޖެއަށް އަމާޒުކުރެވިފައިވާ ބޮޑު ކޮންފަރެންސެކެވެ. މި ބައްދަލުވުމުގެ މައިގަނޑު މައުޟޫއަކީ "މަސައްކަތުގެ މާހައުލު ރައްކާތެރި އަދި ދުޅަހެޔޮ ތަނަކަށް ހެދުމާއި، އައު ސިނާޢަތްތަކަށް ރައްކާތެރި މިންގަނޑުތަކެއް ހިފެހެއްޓުން" މިއެވެ.

މި ޝިއާރުގެ ދަށުން، ވަޒީފާ އަދާކުރާ މާހައުލުގައި ސިއްހަތާއި ރައްކާތެރިކަމުގެ ހަމަތައް މިހާރަށްވުރެ ފުރިހަމައަށް އަމަލީގޮތުން ތަންފީޒުކުރުމާ ގުޅޭގޮތުންނާއި، މީހުން ބިނާކޮށް ފަންނީ ގޮތުން ކުޅަދާނަކަން އިތުރުކުރުމަށް މި ކޮންފަރެންސްގައި ފުޅާ ދާއިރާއެއްގައި މަޝްވަރާތައް ކުރިއަށްދާނެއެވެ. މީގެއިތުރުން، މަސައްކަތުގައި ދިމާވާ ނުރައްކާތަކާއި ހިތާމަވެރި ހާދިސާތައް އެކަށީގެންވާ ގޮތެއްގައި ރިޕޯޓުކުރެވޭނެ އިންތިޒާމުތައް ވަރުގަދަކުރުމާއި، އެކި ދާއިރާތަކުގައި ދުރާލައި ރައްކާތެރިކަމުގެ ފިޔަވަޅުތައް އެޅުމުގެ އާދަ އަށަގެންނެވުމާ ބެހޭގޮތުން ވެސް ވާހަކަދެކެވޭނެއެވެ.

އިޝްތިހާރު އިޝްތިހާރު

މަސައްކަތްކުރާ މީހުންގެ ހައްގުތައް ކަށަވަރުކުރުމަކީ ސަރުކާރުން ހާއްސަ ސަމާލުކަމެއް ދޭ ދާއިރާއަކަށްވުމާއެކު، ވަޒީފާގެ މާހައުލުގެ ރައްކާތެރިކަމާ ގުޅޭ ގާނޫނީ އޮނިގަނޑުތަކުގެ މައުލޫމާތު ފޯރުކޮށްދެވޭނެ ވަސީލަތްތައް ގާއިމުކޮށް، ގުޅުންހުރި ހުރިހާ ފަރާތްތަކެއް އެއްތަންވެ މަޝްވަރާކޮށްގެން ހައްލު ހޯދުމަކީ ވެސް މި ކޮންފަރެންސްގެ މުހިންމު މަގުސަދެކެވެ.

މި ކޮންފަރެންސްގައި ސިއްހީ ދާއިރާގެ މާހިރުންނާއި، އިންޓަނޭޝަނަލް ލޭބަރ އޯގަނައިޒޭޝަން (އައިއެލްއޯ) ގެ މަންދޫބުންގެ އިތުރުން މަތީ ތައުލީމީ ދާއިރާއާއި ސިއްހީ ހިންގުމުގެ ދާއިރާގެ ބޭފުޅުން ހިމެނޭހެން 100 އަށްވުރެ ގިނަ ބައިވެރިން ބައިވެރިވެއެވެ.

އޭއީއެޗްގެ މި އަހަރުގެ އޮކިއުޕޭޝަނަލް ސޭފްޓީ އެންޑް ހެލްތު ކޮންފަރެންސްގެ ޕާޓްނަރުންގެ ގޮތުގައި ހަމަޖައްސާފައިވަނީ ދިވެހިރާއްޖޭގެ ޤައުމީ ޔުނިވަރސިޓީ (އެމްއެންޔޫ) އަދި އެސްޓީއޯ ހެލްތު ކެއަރ ސޮލިއުޝަންސްއެވެ.