މާލޭގެ އުތުރު ފަރާތު ބަނދަރުގައި ތަރައްޤީކުރަމުން އަންނަ ފިންގަރ ޖެޓީތަކުގެ ތަނބުތައް ޖެހުމުގެ މަސައްކަތް އަންނަ ހަފުތާގެ ނިޔަލަށް ނިންމައިލެވޭނެ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ހާމަކޮށްފިއެވެ.
އެމްޓީސީސީން މަޢުލޫމާތު ދެއްވި ގޮތުގައި، މި މަޝްރޫޢުގެ ދަށުން މިހާރު ކުރިއަށްދަނީ 15 މީޓަރުގެ ޖެޓީތަކުގެ ތަނބުތައް ޖެހުމާއި، ތަނބުތަކަށް ދަގަނޑު އެޅުމުގެ (ރެއިންފޯސްމަންޓް) މަސައްކަތެވެ. އަދި އަންނަ ހަފުތާގެ ތެރޭގައި އެ މަސައްކަތްތައް ނިންމައިލުމަށްފަހު، ޖެޓީތަކުގެ ކޮންކްރީޓް މަސައްކަތްތައް ރަސްމީކޮށް ފެށުމަށް ދަނީ ތައްޔާރުވަމުންނެވެ.
ޖުމްލަ 18.98 މިލިއަން ރުފިޔާގެ މި މަޝްރޫޢުގެ ދަށުން، 25 މީޓަރު ދިގު، 6 މީޓަރު ފުޅާ 3 ޖެޓީއާއި، 15 މީޓަރު ދިގު، 6 މީޓަރު ފުޅާ 3 ޖެޓީ ހިމެނޭހެން ޖުމްލަ 6 ފިންގަރ ޖެޓީ ޤާއިމުކުރުމަށް ވަނީ ހަމަޖެހިފައެވެ.
މި މަޝްރޫޢު ނިމި ބޭނުންކުރަން ފެށުމުން، ބަނދަރުގެ ތޮއްޖެހުމަށް ބޮޑު ހައްލެއް ލިބި، ދަތުރުވެރިންނަށާއި އުޅަނދުފަހަރުގެ ފަޅުވެރިންނަށް ބޮޑެތި ފަސޭހަތަކެއް ލިބިގެންދާނެ ކަމަށް އެމްޓީސީސީން ފާހަގަކުރެއެވެ. ޚާއްޞަކޮށް، ބޭރުގައި އަޅާފައި އޮންނަ ލޯންޗުތަކަށް އެރުމަށްޓަކައި އެއް އުޅަނދުން އަނެއް އުޅަނދަށް ހުރަސްކުރަން ޖެހުމުގެ ސަބަބުން ދިމާވާ ދަތިތަކާއި ނުރައްކާތަކަށް ދާއިމީ ހައްލެއް ލިބިގެންދާނެއެވެ.
މީގެއިތުރުން، އިސްރަށްވެހިންނާއި ކުޑަކުދިން އަދި ބަރު މުދަލާއި ލަގެޖާއެކު ދަތުރުކުރާ ފަރާތްތަކަށް ލޯންޗުފަހަރަށް އަރައި ފޭބުމުގައި ރައްކާތެރިކަމާއި ލުއިފަސޭހަކަން ކަށަވަރުވެގެންދާނެއެވެ. އަދި އެއްފަހަރާ ގިނަ އުޅަނދުތަކަކަށް ޖެޓީއާ ކައިރިކުރެވޭނެ ފުރުޞަތު ފަހިވެ، ބަނދަރުގެ ޚިދުމަތްތައް އިތުރަށް ހަލުވިވެގެންދާނެއެވެ.
ކިޔުންތެރިންގެ ހިޔާލު