ގއ. ގެމަނަފުށީ ބަނދަރު ތަރައްޤީ ކުރުމުގެ މަޝްރޫޢުގެ ތެރެއިން ފަޅު ފުންކުރުމުގެ މަސައްކަތް އެމްޓީސީސީ އިން ފަށައިފިއެވެ.
މި މަޝްރޫޢަކީ 70.16 މިލިއަން ރުފިޔާގެ މަޝްރޫޢެކެވެ. މި މަސައްކަތް އެމްޓީސީސީއާ ހަވާލުކޮށްފައިވަނީ 5 ސެޕްޓެމްބަރު 2023 ގައެވެ.
އާބާދީގައި 1,100 އަށްވުރެ ގިނަ މީހުން ދިރިއުޅޭ ގެމަނަފުއްޓަކީ ރާއްޖޭގައި އެންމެ ބޮޑެތި މަސްދޯނިފަހަރު ދުއްވާ އަދި މަސްވެރިކަމުގެ ދާއިރާގައި ފާހަގަކޮށްލެވޭ ރަށެކެވެ. އެމްޓީސީސީން ހާމަކުރާ ގޮތުގައި މި ބަނދަރު ތަރައްޤީކުރެވުމާއެކު، އުޅަނދުފަހަރު ވަދެނުކުރުމަށާއި އެޅުމަށް ދިމާވާ ދަތިތަކަށް ހައްލު ލިބި، ރަށުގެ އިޤްތިޞާދަށް ބޮޑު ކުރިއެރުމެއް ލިބިގެންދާނެއެވެ.
މި މަޝްރޫޢުގެ ދަށުން 37,516 ކިއުބިކް މީޓަރުގެ ސަރަހައްދެއްގެ މެއިންޓެނަންސް ފުންކުރުމުގެ މަސައްކަތާއި، 65,330 ކިއުބިކް މީޓަރުގެ އާ ބަނދަރު ފުންކުރުމުގެ މަސައްކަތް ހިމެނެއެވެ. މީގެއިތުރުން 201 މީޓަރުގެ ޖިއޯބޭގް ރިވެޓްމެންޓް ޖެހުމާއި، 11 މީޓަރުގެ ބޭރުތޮށި ލުމާއި، 221 މީޓަރުގެ ވެލިބުރި ބޭރު ރިވެޓްމެންޓް ޖެހުމާއި، 210 މީޓަރުގެ އެތެރެ ރިވެޓްމެންޓް ޖެހުން ހިމެނެއެވެ.
އޭގެ އިތުރުން 405 މީޓަރުގެ އެއްގަމުތޮށި ލުމާއި، 2,635 އަކަމީޓަރުގެ ޕޭވްމަންޓް ހެދުމާއި، 18 މީޓަރު ދިގު 2 މީޓަރު ފުޅާ ފާލަމެއް ބިނާކުރުމުގެ އިތުރުން، ނެރު ބައްތިއާއި ބަނދަރު ބައްތި ހަރުކުރުމުގެ މަސައްކަތް މި މަޝްރޫޢުގެ ތެރޭގައި ހިމެނެއެވެ.
ކިޔުންތެރިންގެ ހިޔާލު