ހއ. މުރައިދޫގައި ތަރައްގީކުރަމުން އަންނަ ޕޮލިސް ޕޯސްޓުގެ ފުރާޅުގެ ގިއުގަނޑުގެ މަސައްކަތްތައް ކުރަމުން އަންނަ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ބުނެފިއެވެ.
މުރައިދޫގައި ގާއިމުކުރާ މި ޕޮލިސް ޕޯސްޓަކީ، ރާއްޖޭގެ މީހުން ދިރިއުޅޭ ހުރިހާ ރަށެއްގައި ފުލުހުންގެ ހިދުމަތް ފުޅާކުރެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެންގުޅުއްވާ ސިޔާސަތުގެ ދަށުން ކުރިއަށްގެންދާ މުހިންމު މަޝްރޫއެކެވެ.
މި އިމާރާތުގެ ބިންގާ އަޅާފައިވަނީ މިދިޔަ އަހަރުގެ ޖެނުއަރީ މަހުގެ ތެރޭގައި ރައީސުލްޖުމްހޫރިއްޔާ އެރަށަށް ކުރެއްވި ދަތުރުފުޅުގެ ތެރެއިން ބޭއްވި ހާއްސަ ރަސްމިއްޔާތެއްގައެވެ. މި މަޝްރޫއުގެ ބިންގާ އަޅުއްވައިދެއްވީ ދާޚިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިހުސާނެވެ.
ދިވެހިރާއްޖޭގައި އަމާން، ޞުލްހަވެރި ވެއްޓެއް ގާއިމުކުރުމަށްޓަކައި ސަރުކާރުން އަންނަނީ މުޅި ރާއްޖޭގައި ފުލުހުންގެ ހިދުމަތް ފުޅާކުރުމުގެ ބޮޑު މަޝްރޫއެއް ހިންގަމުންނެވެ. މިގޮތުން ރަށްރަށުގައި ހުރި ފުލުހުންގެ މަރުކަޒުތައް މަރާމާތު ކުރުމާއި، އަލަށް ޕޮލިސް ޕޯސްޓުތައް ޤާއިމުކުރުމުގެ އިތުރުން ފުލުހުންގެ އައު މަރުކަޒުތައް އެޅުމުގެ ގިނަ މަސައްކަތްތަކެއް އަންނަނީ ކުރެވެމުންނެވެ.
ރާއްޖޭގައި ކުށްކުރާ މީހުން މަދުކޮށް، ގާނޫނާއި ގާވާއިދަށް ހުރުމަތްތެރިކޮށް ހިތާ މުޖުތަމައެއް ބިނާކުރުމަށްޓަކައި، ފުލުހުން ރައްޔިތުންނަށް ފޯރުކޮށްދޭ ހިދުމަތްތައް މިހާރަށްވުރެ ފެންވަރު ރަނގަޅުކޮށް އަވަސް ހިދުމަތްތަކަކަށް ހެދުމަށް ސަރުކާރާއި ދިވެހި ފުލުހުންގެ ހިދުމަތް ގުޅިގެން މެދުކެނޑުމެއްނެތި މަސައްކަތް ކުރަމުންދެއެވެ.
ކިޔުންތެރިންގެ ހިޔާލު