ސީޕީކަޕް ފުޓްސަލް މުބާރާތް (ޕަވަރޑް ބައި ޒެޑް އެކްސް ސްޓަޑީޒް އެބްރޯޑް) ފިރިހެން ޑިވިޜަންގެ ފައިނަލްގައި ނޯތު ޕޮލިހާއި ހުޅުމާލެ ޕޮލިސް ވާދަކުރި މެޗު ތަފާތު މޮޅުކުޅުމެއް ދެއްކުމަށްފަހު މުބާރާތުގެ ޗެމްޕިއަންކަން ނޯތު ޕޮލިސް ހޯދައިފިއެވެ.
ކޮމިޝަނަރ އޮފް ޕޮލިސް އަޙުމަދު މުޙައްމަދު ޝަރަފުވެރިކޮށްދެއްވި މި މެޗު ނޯތު ޕޮލިސް ކާމިޔާބުކޮށްފައިވަނީ 4 ލަނޑު 1 ލަނޑުންނެވެ.
ގިނަ އަދަދެއްގެ ސަޕޯޓަރުންގެ ކުރިމަތީގައި ކުޅެވުނު ފައިނަލް މެޗުގެ ފުރަތަމަ ހާފުގައި ނޯތު ޕޮލިސް ވަނީ އެ ޓީމުގައި ހިމެނޭ ހަލުވި ކުޅުންތެރިންގެ އެހީތެރިކަމާއެކު 3 ލަނޑުގެ ލީޑެއް ނަގާފައެވެ. 3 ލަނޑު ވެސް ކާމިޔާބުކޮށްދިނީ މުބާރާތުގެ ސެމީފައިނަލްގައި 5 ލަނޑު ކާމިޔާބުކުރި، އެ ޓީމުގެ ޙަސަން ހޫދު އިބްރާހިމްއެވެ. އަދި ފަހު ހާފުގައި ޖެހި ލަނޑާއެކު ހޫދު ވަނީ މުބާރާތުގައި ޖުމުލަ 13 ގޯލު ޖަހައިގެން އެންމެ ގިނަ ގޯލުޖެހި ކުޅުންތެރިއާގެ މަގާމު ހާސިލުކޮށްފައެވެ. ހުޅުމާލޭގެ ހަމައެކަނި ލަނޑު، ފަހު ހާފުގައި ކާމިޔާބުކޮށްދިނީ އެ ޓީމުގެ އިރުނާސް އަޙްމަދުއެވެ.މުބާރާތް ނިމުމުން، މުބާރާތުގެ ވަނަތަކަށް ޓްރޮފީއާއި މެޑަލް ހަވާލުކޮށްފައިވެއެވެ. މުބާރާތުގެ ފައިނަލް މެޗުގެ އެންމެ މޮޅު ކުޅުންތެރިޔާގެ މަގާމު ހާސިލުކޮށްފައި ވަނީ ނޯތު ޕޮލިހުގެ ޙަސަން ހޫދު އިބްރާހިމްއެވެ.
އެންމެ މޮޅު 5 ކުޅުންތެރިންނަށް ހޮވިފައި ވަނީ ނޯތު ޕޮލިހުގެ ޙަސަން ހޫދު އިބްރާހިމްއާއި، އާދަމް ޝައިފާން މުޙައްމަދުއާއި، ޢަލީ ނަޒުމީގެ އިތުރުން އެޗްއެމްޕީގެ އަބާން މުޙައްމަދު އަދި އަޖުލާން ޢަބްދުލް ޙަންނާނުއެވެ. މުބާރާތުގެ ހުރިހާ ގޮތަކުން އެންމެ މޮޅު ކުޅުންތެރިޔާއަށް ހޮވިފައި ވަނީ ނޯތު ޕޮލިހުގެ ޢަލީ ނަޒުމީއެވެ. ފެއަރޕްލޭ ކުޅުންތެރިޔާއަށް ހޮވިފައި ވަނީ ފޮރެންސިކް ފްރެންޑްސްގެ މުޙައްމަދު ނާހިލް ނޫޙުއެވެ.
އެންމެ ހިންގުންތެރި މެނޭޖަރަށް އެޗްއެމްޕީގެ ޝަޒުވާން އަޙުމަދު ހޮވިފައިވާއިރު ފިރިހެން ޑިވިޜަންގެ އެންމެ މޮޅު ކޯޗަށް ހޮވިފައި ވަނީ ނޯތު ޕޮލިހުގެ މުޙައްމަދު ރިޒާއެވެ. މުބާރާތުގެ ފެއަރޕްލޭޓީމަށް ހޮވިފައި ވަނީ ޑީސީއެސްއާރުސީއެވެ.
ކިޔުންތެރިންގެ ހިޔާލު